Nunarput Ukrainimiit qimaasunut tikilluaqqusissanerluni suli isumminngitsoq
Ukrainemit inuit 800.000-t ikinnerunngitsut nunaminniit qimaasimalertut Naalagaaffiit Peqatigiit naatsorsorpaat.
Savalimmiut Ukrainemit qimaasunik tikilluaqqusinissaminnut piareersimallutik nalunaarput.
Nunarpulli taama ersaritsigisumik nalunaarnissamik suli piareersimanngilaq.
Naalakkersuisut siulittaasuat nunatsinnilu partiit siuttui ikiuerusupput, qimaasunilli tikilluaqqusisoqassanersoq aalajangiiffigineqartinnagu eqqartorluaqqaarusuppaat.
AAMMA ATUARUK Johan nunatsinneersoq Ukrainimi qaattartumeerisoqarnerani itertitaasoq: Annilaarnaqaaq
- Nunatsinni partiit akunnitsinni tamanna eqqartugassarivarput. Aamma qanoq alloriarfiginiarnerlugu tassunga tunngavississallugu. Apeqqut taanna pingaarnerpaarpaajuvoq ataatsimoorfigisariaqarnera,
Ukrainimiit qimaasunik nunatsinnut tikilluaqqusisoqarsinnaanermut apeqqummut Múte B. Egede akivoq.
Siumut: Ukainimiut illussaqartinneqarlutillu suliffissaqartinneqassasut
Kalaallit Nunaat sorsunnermi assigiinngitsutigut ikiuunnissamut piareersimassasoq Siumup siulittaasua Erik Jensen isumaqarpoq.
Qimaasunilli tikilluaqqusinissanut apeqqut partiit akimorlugit oqaluuserineqaqqaartariaqartoq Erik Jensen oqarpoq:
- Nunarput qimaasunik tigusissappat qulakkiigassagut arlaqarput. Ineqarniarnikkut, suliffissaqarniarnikkut ilaqutariillu qanoq ikiorserneqarnissaannut tunngaassuteqartut. Taamaattumik apeqqut taama annertutigisoq qulaajarsimatinnagu paasilluarsimatinnagu torrutiinnarlugu qanoq inissisimassanersoq oqaatigiuminaappoq, Siumup siulittaasua Erik Jensen oqarpoq.
Demokraatit siulittaasuat Jens-Frederik Nielsen ikiuunnissamut piareersimavoq, piviusorsiortoqartariaqartorli naqissuserpaa:
- Kalaallit Nunaat 100.000 tusindilikkaannik qimaasunik tigusisinnaanngilaq. Taamaammat piviusorsiortumik taanna isigalugu qanoq ikiorneqarsinnaasut suullu uagut tunniussinnaanerigut qimaasuninngaanniik tigusatsinniik taanna piviusorsiortumik eqqarsaatigalugu una oqallinneq ingerlassaaq, Jens-Frederik Nielsen oqarpoq.
Nunarput qimaasunik tikilluaqqusinissarput ammaffigigitsik tamannali "pisinnaasarput malillugu killilimmik" pissasoq Atassutip siulittaasua Aqqalu Jerimiassen KNR-imut allakkatigut akissuteqarpoq.
Nunatsinni innuttaasut ikiuerusuttorpassuit angerlarsimaffimminnut tikilluaqqusinissaminnut periarfissaqartut Aqqalu Jerimissen allappoq.
Naleraq: Inissaaleqineq qimaasunut aporfiussaaq
Nunatsinni ajornartorsiutit suli aaqqiivigineqartinnagit, qimaasunik nunatsinnut ammaassissagutta, immitsinnut artukkernissarput naalakkersuisoqataasut partiiani politikikkut oqaaseqartartup Jens Napãtôp aarleqqutigaa.
- Inissaaleqinerujussuaq ajornartorsiutit annertoorujussuit pigitillugit aamma angerlarsimaffeqanngitsut taama amerlatigitillugit, naalakkersuinikkut iliuuseqarfiginiarneqarnerisa aallarteruttorfiani, taakku iliuuseqarfiginagit innarleqqissappata eqqarsarnartoqartittorujussuuarput, Jens Napãtôk oqarpoq.
AAMMA ATUARUK Múte: Mattussinerit qanoq sunniuteqarnissaat suli oqaatigiuminaappoq
Ruslandip Ukrainimut ullut arfinillit matuma siorna saassussivoq, maannamullu inuit 2000-t sinnerlugit toqutaareerput.