Nunarput Tuluit Nunaallu aalisarnermut tunngasuni suleqatigiiginnassasut

Aalisarnermut, piniarnermut nunalerinermullu naalakkersuisoq Jens Immanuelsen kunngeqarfimmik Tuluit Nunaannik Irlandillu avannaanik aalisarneq pillugu aamma aalisarnermut tunngasunik annerusumik suleqatigiissuteqassallutik paaseqatigiinnissamik isumaqatigiissummik ullumi novembarip ulluisa qulingiluaanni atsioqatigiipput.

Naalakkersuisut nittartagaanni tamanna atuarneqarsinnaavoq.

- Tulluussimaarutigaara Kalaallit Nunaat Tuluit Nunaannik paaseqatigiinnissamik isumaqatigiissuteqarluni ullumi atsiorsinnaammat aalisarnerlu pillugu ingerlatsinerup ineriartortinneqarnissaanut suleqataanissamut qilanaarpunga, aamma ilisimatusarnermut. Neriuutigivaralu aamma aalisarnermik inuussutissarsiornerup ineriartortinneqarnissaa, isumaqatigiissutip tamanna periarfissimmagu, Aalisarnermut naalakkersuisoq Jens Immanuelsen oqarpoq.

AAMMA ATUARUK Nunatta tulunnut upernaamut isumaqatigiissuteqarnissani neriuutigigaa

Taassuma Tuluit Nunaanni avatangiisinut, aalisarnermut nunamilu pissutsinut ministeriulluni allatsip tullia Victoria Prentiss isumaqatigiissummik atsioqatigivaa.

Isumaqatigiissutigineqartoq Kalaallit Nunaat aamma kunngeqarfik Tuluit Nunaat aalisarneq pillugu isumaqatigiissuteqartarnissaannut, taassumalu ineriartortinneqarsinnaasaanut tunngaviliivoq.

Tuluit Nunaata EU-mi aappaagu januaarip aallaqqaataani ilaasortaajunnaarnissaa naatsorsuutigineqarpoq, ilaasortaajunnaareerpallu aalisakkat pillugit ataatsimiittarnissamut tunngaviliilluni, soorlu aamma aalisakkat pillugit aqutsinermut, nakkutilliinermut, ilisimatusarnermut, isumassarsianut nutaanut aalisarnermilu suliaqartut suleqatigiinnissaannut tunngaviliisoq.