Nunatta tulunnut upernaamut isumaqatigiissuteqarnissani neriuutigigaa

Raajat saarulliillu.

Nunatta Tuluit Nunaannut niuerutigisartagaani taakku marluk pingaarnerpaapput.

Nioqqutissat taakku marluk nunatsinnit atorfillit tulunnut niueqatigiinnissamut isumaqatigiissuteqarnissamut missingersuusiamik upernaaru saqqummiussinissamut ulapputeqarnerannut pissutaapput.

Nunatta EU-p Belgiami Bruxellesimi Sinniisoqarfiata pisortaa, Mininnguaq Kleist taama oqarpoq.

- Tuluit Nunaat EU-mi niueqatigisatsinni annerpaat ilagaat taamaammat inissinnissaa pingaaruteqarpoq, Mininnguaq Kleist oqarpoq.

Tuluit Nunaat EU-mit januaarip ulluisa 31-anni anivoq, tuluilli aninerat nunatsinnut atassuteqarnermut suli sunniuteqanngilaq.

Tuluit aninerat nunatsinnut suli sunniuteqanngitsoq

Tuluit Nunaata aninerani ukiup naanerata tungaanut ikaarsaariartoqassaaq. Taamaammat nunatta Tuluit Nunaannut EU aqqutigalugu niueqatigiinnermut sinaakkutarisai suli allanngunngillat.

Siunissarli suli qularnarpoq. Niueqatigiinnissamut isumaqatigiissuteqarnissamut atatillugu nunarput siulliulluni isumaqatigiinniartussaavoq.

- Aallaqqaammut atorfillit akornanni nunatta niueqatigiinnissamut isumaqatigiissuteqarnissamut siunnersuusiornissaa isumaqatigiissutigineqarpoq. Arsaq uagut maannakkut tigummivarput, sinniisoqarfiup pisortaa oqarpoq.

Naatsorsueqqissaartarfiup, Aningaasanut Naalakkersuisoqarfiup Nunanulluunniit allanut tunngasunut Naalakkersuisoqarfiup nunatta tulunnut ukiut tamaasa aningaasat qanoq amerlatigisut avammut niuerutigisarnerai paasissutissiissutigisinnaanngilaa.

Mininnguaq Kleistilli oqarnera naapertorlugu suliffissuarnit tamanna ukiumut 600-t aamma 700-t millionit koruuniusartut nalunaarutigineqarsimavoq, kisitsilli inaarutaasumik uppernarsarneqanngitsoq oqaatigaa.

- Kisianni qanorluuniit inissisimasoqaraluarpat nuna uatsinnut avammut niueqatigissallugu pingaaruteqarpoq, sinniisoqarfiup pisortaa oqarpoq.

Isumaqatigiissuteqarnissaq suli qularnartoq

Savalimmiut Tuluit Nunaannut siorna januaarimili niueqatigiinnissamut isumaqatigiissuteqareerpoq. Nunattali EU-mi isumaqatigiissutai aallat pissutigalugit nunarput tuluit EU-mit anereerneranni aatsaat isumaqatigiissuteqarsinnaavoq. Taamalu maanna suliaqartoqaleruttorpoq.

Niueqatigiinnissamut isumaqatigiissutit nutaat tunngaviusumik nunatta EU-mut isumaqatigiissutigeriigaanut assingunissaa pilersaarutaavoq. Taamaakkaluartorli suli qularnartoqartoq, Mininnguaq Kleistip erseqqissaatigaa.

Tamanna akitsuutinut ilaatigut tunngassuteqarpoq.

- Tuluit naalakkersuisuisa kaaallit avammut niuerutigisartagaanni pingaarnerpaani tassa raajanut saarullinnullu akitsuusiinissamut pilersaaruteqanngikkallarnerat uatsinnut pitsaasuuvoq, Mininnguaq Kleist oqarpoq.