Trumpip Ukrainep præsidentianik oqaloqateqarsimaneranut tunngatillugu nunarput akuliunneqartoq
Donald Trumpip nunatta pisiarinissaanut isumaliuteqarnera Ukraine pillugu USA-mi suliamut attuumassuteqartinneqaleriasaarpoq.
Amerikap Ukrainemi aallartitaata, Bill Taylorip oktobarimi tusarniaavigineqarnerani allakkani ippassaq saqqummersinneqartumi tamanna ersersimasoq tuluit aviisiata The Guardian-ip CNN-illu allaaseraat.
Ukraine pillugu suliaq Donald Trumpip naalakkersuisunut eqqartuussivimmut sassartinneqarneranik kinguneqartitserataannaammat soqutiginarpoq. Suliaq taanna ataatsimut isigalugu, Donald Trumpip Ukrainep præsidentia kimigiiserfiginiarlugu Amerikap Ukrainemi sakkutuunut aningaasat tapiissutissaanik uninngatitsinermigut pissaanermik atornerluisimaneragaaneranut attuumassuteqarpoq.
Paasissutissanik saqqummiisoq naapertorlugu Trumpip Ukraine demokraatini præsidentimik qinersinissamut sassarniartuni piukkunnarnerpaatinneqartoq - tassa Amerikap præsidenterisimasaanut tullersortaasimasoq, Joe Biden taassumalu ernera, Hunter Biden, pillugit pisortatigoortumik misissueqqusimavaa.
Nunarpullumi suliami tassani taaneqaqqippoq.
Trumpip nunatta pisiarinissaa soqutigigaa
Atorfilittat suliamut attuumassuteqartut angalasarnerat nunatsinnillu ukkataqarujussuarnerat USA-p tapiissutissani Ukrainemut tunniunnissaanut isumaqatigiinniaqatiginiarlugit attavigiuminaassimasut, Amerikap aallartitaa tusarniaavigineqarnermini oqarpoq.
Taylorip tusarniaavigineqarnermini aamma oqaatigaa, USA-p Ukrainemi sakkutuunut aningaasatigut tapersiinissaa pillugu suliap ingerlanneqarnera sivitsortoq. Tamanna ilaatigut USA-mi atorfilittat Trumpip Kalaallit Nunaannik pisiariumanninneranik ukkassivallaarsimanerannik pissuteqartoq aallartitap Taylorip oqaatigaa.
- NCS-ilu (Amerikap isumannaallisaaniaqatigiivi, aaqq.) suliamik Kalaallit Nunaata pisiarinissaanut tunngasumik taamanikkut ukkassileruttorsoraara, Taylor oqarpoq.
Danmarkimut tikeraarnissi taamaatikkaa
Russit qeqertaasaq Krim Ukrainep kangisissuaniittoq tiguarnikuummassuk Amerikamit ikiorneqarnissaq Ukrainemut pingaaruteqarpoq. USA-llu naalakkersuisoqarfiini sulisut ilaat naapertorlugit nunatsinnik ukkassinerujussuaq nunanut allanut sillimaniarnermullu politikkimut sulianut pingaarutilinnut allanut akornutaasimarpasittoq Ukrainemut aallartitap nassuiaaneranit erserpoq.
Amerikap præsidentiata Trumpip nunarput aggustimi pisiariumanerarpaa. Tamatumunnga atatillugu Naalakkersuisut nunarput tuniniagaannginnerarpaat, niueqatigineqarsinnaanerarluguli. Danmarkillu ministeriunerunerata, Mette Frederiksenip, piserusunneq isumaqanngilluinnarnerarpaa.
Tamanna Donald Trumpip Danmarkimut tikeraarnissaminik taamaatitsineranik kinguneqarpoq, tikeraarnissaraluaminilu Naalakkersuisut siulittaasuat, Kim Kielsen, naapittussaagaluarpaa.
