Namminersorlutik Oqartussat: Niueqateqarusuppugut kisianni tuniniagaanngilagut
USA-p præsidentia Donald Trump Kalaallit Nunaannut præsidentiusoq. Imaluunniit USA Kalaallit Nunaannik piginnittoq. Præsidenti Kalaallit Nunaat pisiarerusullugu, amerikamiut aviisiat The Wall Street Journal naapertorlugu, eqqarsaatersorpoq.
- Nunarput tuniniagaanngilaq, nunanut allanut tunngasunut naalakkersuisoq, Ane Lone Bagger (S), oqarpoq.
Amerikamiut præsidentiata Kalallit Nunaata pisiarinissaanik soqutiginninnerminik oqarsimanera ullaakkut tusarliunneqarmat qisuarneq takkuppoq.
Nalakkersuisut siulittaasuat Kim Kielsen (S) aamma taamatut qisuariarpoq:
- Kalaallit Nunaat tuniniagaanngilaq tunineqarsinnaanilu. Kisianni nunanik allanik – USA ilanngullugu - niueqateqarsinnaaneq suleqateqarsinnaanerlu ammaffigaarput, Kim Kielsenip oqaaseqaataani naatsunnguami nittartagaanni atuarneqarsinnaavoq.
KNR itinerusumik oqaaseqartitsiniarsimagaluarpoq, iluatsinngitsumilli. Naalakkersuisoqarfik paasissutissiivoq Kim Kielsen taanna pillugu oqaaseqaqqinnianngitsoq.
Periarfissarsiortoq
Aviisimi The Wall Street Journalimit tusarfiit naapertorlugit, Trumpip siunnersortini Kalaallit Nunaannik pisinissamik periarfissanik misissueqqusimavai.
Tamannali periarfissaanngitsoq, nunanut allanut tunngasunut naalakkersuisoq oqarpoq.
- Siullermik erseqqissaatigissavara nunanut kikkunnulluunniit niueqatigiinnissamik ammavugut. Aamma USA-mut. Aamma erseqqissarneroqqissinnaagunanngilara oqassaguma nunarput tuniniagaanngitsoq.
AAMMA ATUARUK Aaja Chemnitz Larsen: Kalaallit Nunaat tuniniagaanngilaq
Folketingimut ilaasortap Aaja Chemnitz Larsenip (IA) Trumpip oqariartuutaa iluarivallaanngilaa.
- Qujaannarpunga. Kalaallit Nunaata Danmarkillu suleqatigiinnerat nukittorsarneqarnissaa kissaatigineruara, Aaja Chemnitz Larsen attaveqaqatigiittarfikkut Twitterikkut allappoq.
Silanngajaarnerusoq
Dansk Folkepartip nunanut allanut Kalaallillu Nunaat pillugu oqaaseqartartuata, Søren Espersenip, præsidenti aamma iluarsorinngilaa.
- Ilumoorsimappat taama eqqarsaatersortoq silanngajaalersimassaaq. Danmarkip inuit 50.000-t USA-mut tuniniarnissaat silanngajaarneruvoq, Søren Espersen oqarpoq.
Venstremi siulittaasup, Lars Løkke Rasmussenip, præsidenti aamma ikasarnerarpaa:
- Asuleersimassaaq ikasarluni. Paatsiveqanngilaq, Lars løkke Rasmussen Twitterikkut allappoq.
Donald Trump ataatsimeeqatigineqassaaq
Donald Trumpimit aamma præsidentip Washingtonimi illorsuaniilluunniit massuma ilumoornera suli uppernarsarneqanngilaq.
USA-p nunarput pisiariumareernikuuaa. USA-mi præsidentiusimasup Harry S. Trumanip nunarput, Alaskamik paarlaakkumareerluni, 100 millionit dollarsilerlugu 1946-mi pisiariumanikuuaa.
AAMMA ATUARUK Lars Løkke Trump pillugu: Asuleersimassaaq
Donald Trump Danmarkimut septemberip ulluisa aappaanni pingajuannilu tikeraassaaq.
Kim Kielsenip ataatsimeeqatigineqarnissaata saniatigut ministeriuneq Mette Frederiksen aamma Savalimmiormiut lagmandiat Aksel V. Johannesen ataatsimeeqatigineqassapput.
Ataatsimiinnermi Kalaallit Nunaat issittorlu oqallisigineqassapput.
Naalakkersuisut Siulittaasuat, Kim Kielsen, oqaaseqartinniarsaraarput.