Nunarput pitsaasumik maluginiarneqarpoq
Tamanna pivoq, Kalaallit Nunaanni suut aningaasarsiutigineqarsinnaasut pillugit inuussutissarsiornermut, suliffeqarnermut, niuernermut nunanullu allanut naalakkersuisoq, Vittus Qujaukitsoq oqalugiarmat.
Innuttaasut tunniussinnaasaat pitsaasut, ilinniartitaaneq allallu inuit ataasiakkaat tunniussinnaasaat, Kalaallit Nunaata aningaasarsiorniarnerani pingaarnertut isumalluutaasut, Vittus Qujaukitsup naqissuserpaa.
Aamma nunami attaveqaatit ineriartortinneqarnissaat pingaaruteqartutut oqaatigalugu, ilaatigut Ilulissani Nuummilu mittarfiit tallineqarnissaat eqqartorpaa, taamatullu Tasiilami Kujataanilu mittarfiliortoqarnissaa aamma eqqaallugu.
Arctic Circlemut assigisoq Nuummi
Tamakku eqqartoreerlugit nuannaarutiginerarpaa, Nuummi aappaagu 2016-mi pisussaq, tassa issittoq pillugu isumasioqatigiinnissaq, Arctic Circle-mut assigusoq pisussaammat.
Vittus Qujaukitsup pitsaasumik maluginiarneqarnerata saniatigut, Nunatsinni ammerivik, Great Greenland, puisit amiinik sulianik takutitsivoq, tamanna Nunat Avannarliit ministeriisa Isumalioqatigiivini Nunarput sinnerlugu suliaqartumit, Nauja Biancomit ilisaritinneqarluni. Tamannalu isumasioqatigiinni peqataasunit nuannarineqarluartoq, suleqaterput Marianne Stenbæk oqaluttuarpoq.