Nunarput pillugu nittartagaqalerneratigut Danmarkimi atuartut ilisimasaqarnerulissapput

Københavnimi Kalaallit Illuutaat atuakkiorfik Forlaget Epsilon suleqatigalugu Danmarkimi meeqqat atuarfianni atuartunut atuartitsissutissamik suliaqarpoq qulequtserlugu ’Dagens Grønland’. Atortut nittartakkatigut ullumi saqqummiunneqassapput.

Kalaallit Illutaa qallunaanit atuartunit 800-t 900-llu missaannik amerlatigisunit ukiormut paasisassarsiorfigineqartarpoq.
Nunatsinni ullutsinni pissutsit piviusorpalaarnerusullu atuartitsissutigissallugit ilinniartitsisut ajornakusoortittarpaat, tassami ilinniartitsissutigineqartartut nutarterneqarneq ajormata, Københavnimi Kalaallit Illuutaanni pisortaq Leise Johnsen oqarpoq.

- Ilinniartitsisunit tusarnerusarparput Kalaallit Nunaat pillugu ullutsinnut naleqquttunik nutarsakkanillu ilinniartitsinermi atortunik amigaateqartartut. Periarfissarlu tamanna atorluarlugu ilinniartitsissutinik torrallatanik pilersitsisoqarpoq, Leise Johnsen oqarpoq.

Nittartagaq sammisanik assigiinngitsunik 13-inik imaqarpoq, taakkunanilu allaaserisat 130-ngajaallutik. Nunatsinni aatsitassarsiorneq, Nunatta kulturia, kalaallit oqaasii silap pissusiatalu allanngoriartornera pillugit ilaatigut sammineqarsinnaapput, paasissutissanillu imarisassanillu nutaanik ilaartorneqartassalluni.

Taassuma saniatigut qallunaat atuartut Kalaallit Nunaanni inuuneq pillugu isumassarsiortinneqartassapput.
- Nunaqarfinni inooriaaseq pillugu paasisimasaqarneq pitsanngorsarneqassaaq. Nunaqarfinni inuuniaraanni suut sapinngittariaqarpat? Nunaqarfimmiuusimasut, inuunerminni alloriaqqissimasut, nassuiaataannik peqartassaaq. Tamannali sunik imaqarpa? Taava ima aperisassaagut: Maanna ilisimasatit atorlugit nunaqarfimmi najugaqarusussavit?

Nittartagaq "Dagens Grønland"-imik taaguuteqartoq Kalaallit Illuutaanni ullumi katersuutsitsisoqarnerani atulersinneqassaaq, kalaallillu folketingimut ilaasortat marluk danskillu partiiannit Venstremeersoq meeqqat pillugit ilinniartitaanermullu tunngatillugu oqaaseqartartua peqataassallutik.