Nunarput nutartigassanut aningaasaateqarfimmik pisariaqartitsivoq
Nunatsinni illut ilaatigut oqummik ajornartorsiuteqarfiginerisa kingunerisaanik nunatta karsia illunik nutarterinermut aningaasartuuterpassuarnut malinnaasinniarnissaa ajornakusoortupilusuusimavoq. Illut ataasiakkaat ima ingasatsigisumik eqqugaasimatigipput, allaat ingutsersinnarlugit nutaanik sanaartortoqartariaqarsimalluni, tamannalu aningaasartuuterpassuarnik kinguneqartarpoq. Tamannalu maanna unitsinneqartariaqalerpoq, Kaali Olsen IA tunuliaqutaralugu Inatsisartunut qinigassanngortittoq isumaqarpoq.
-Nutartigassanut aningaasaateqarfiliornikkut pisortat ukiumoortumik naatsorsuutaanni - Namminersorlutik Oqartussani kommuninilu - pisortat illuutaannik aserfallatsaaliuinermut/nutarterinermut aningaasanik immikkoortitsinissamik inatsitsitigut pisussaaffiliisoqassaaq. Inatsisitigut pisussaaffiliinissaq piffissaq qanittoq isigalugu politikkikkut aalajangiinerit kingunerisaannik pisortat illuutaasa aserfallatsaaliuinikkut kinguaattoorfiunnginnissaannik siunertaqarpoq, Kaali Olsen oqarpoq.
Tamanna pisortat ukiut tamaasa pisortat aningaasaateqarfiannut aningaasanik immikkoortitsisarnissaannik isumaqarpoq, taassumalu pisortat illuutaannik nutarterineq aserfallatsaaliuinerlu isumagissavaa.
