Nunarput itsaq orpippassuaqarfiusimavoq
USA-mi ilisimatuut imeq aappilarujuttoq nunatta sermesuata naqqaneersoq misissoqqissaarniarlugu USA-liaasimavaat.
Imeq aappilarujuttoq 2003-mi aasaagaa sermersuarmit qaqinneqarpoq.
Sermersuup 3 kilometerinik issussusillip naqqani qaqitat Københavnimiipput, amerikamiullu ilisimatuui misissueqqissaagassaminnik sermersuaminernik amerikaliaasisinnaasimapput.
Ilimagineqarpoq imiup aappilarujuttup orpiminernik akoqassasoq, itsaq Kalaalit Nunaat ukiut milliuunerpaaluit matuma siorna orpeqarfiugallarmat.
Ilisimatuullu paasiniartussanngorpaat itsarsuaq inoqarsimanersoq.
Danmarkimi ilisimatuut naatsorsuutigaat upernaaru imiup aapilarujuttup suusinnaanera paasisinnaassallugu. Aasarlu sermersuarmi qillerinermi orpimineq itsarsuarnisaasoq paasineqartoq sermersualeritooq Jørgen Peder Steffensen, Københavnimi ilisimatusarfimmeersoq oqarpoq.
Jørgen Peder Steffensen radioaviisimut oqarpoq isumaqarsimagaluarlutik orpimineq namminneq atortumi puaneersimassasoq, qillerummi nippusimasuusoq, misissoqqissaarneranili paasigitsik orpiminiusoq itsarsuarnisaq. Orpimineq ilimagineqarpoq ukiut 2 milliuunit angullugit pisoqaassuseqarsinnaasoq.
Imeq aappilarujuttoq Tysklandimi USA-mi Frankrigimi Danmarkimilu misissorneqarpoq. Ilisimatuullu aamma paasiniassavaat uumasut naasulluunniit DNA-vanik nassaasaqarnersoq kiisalu sermersuup naqqani ullumikkut uumassuseqarnersoq.
