Nunarput Issittumi Siunnersuisooqatigiinnit tunuarallarpoq
Issittumi Siunnersuisoqatigiinni isumaqatigiinniarluni ataatsimiittarnerni Kunngeqarfimmi Danmarkimi naalagaaffeqatigiit pingasuusut tamarmik immikkut sinniisoqartitsineranut ileqquusut maannamut atuussimasut Sverigep siulittaasuunerata nalaani atorunnaarsinneqarsimammata taama aalajangerneq pisariaqarsimavoq. 2011-mi ukiakkulli Issittumi Siunnersuisoqatigiinni isumaqatigiinniarluni ataatsimiittarnerni Kalaallit Nunaat ileqquusut avaqqullugut peqataatinneqartarsimanngilaq. Issittumi Siunnersuisoqatigiit 1996-mi pilersinneqarmalli qitiusumik isumaqatigiinniartarnerni nunarput nammineerluni sinniisoqartaraluarpoq. Kalaallit Nunaat tassaavoq Issittumi nunatuaasoq nunap inoqqaavinik innuttaassutsikkut amerlanerussuteqarfiusoq.
Taamatut aaqqissuussigallarsimaneq Naalakkersuisuusimasunit, maannakkullu Naalakkersuisuusunit nunatsinnut naammaginartutut isigineqanngimmat siunissami Issittumi Siunnersuisoqatigiinni svenskit siulittaasoqarfimmik tigumminneranni ileqquliunneqarsimasup siunissami siulittaasoqarfissani nanginneqannginnissaa qulakkeerniarneqarsimavoq.
Naammaginartumik aaqqiisoqarnissaata tungaanut Issittumi Siunnersuisoqatigiinni nunatta peqataanera unitsinneqarallarpoq.
Kalaallit Nunaata taamatut ullumi aalajangerneraniit canadamiut siulittaasunngortussat piviusumik isumaqatiginninniarfigineqalissapput, Issittumi Siunnersuisoqatigiinni nunatta siunissami peqataaqqilernissaanut sulileqqinnissaanullu sinnaakkutit naammaginartut sukkanerpaamik qulakkeerniarlugit.
