Nunarput Island Gamesimi siullermeertumik ujaminnattoq
Nunarput Gibraltarimi Island Gamesertoqarnerani siullermeertumik ujaminnappoq. Tassa eqimattakkaarluni nerrivimmi arsaararnermi bronzennappoq.
Nunatsinnit nerrivimmi arsaarartartut sulorartartullu tamarmik Island Gamesimi Gibraltarimi ingerlanneqaleruttortumi ingerlalluartorujussuupput.
Sulorartartut sapaammi ataasinngornerullu ullaani unamminerni pingasuni ingerlalluarlutik semifinaalimut anngupput, ataasinngornermilu Nunatta nalunaaqutaa malillugu ualikkut marlunut unammissallutik. Matumani Geernseymeersut unammissallugit,
Nerrivimmi arsaararnerit ataasinngornermi ullaap tungaa semifinaalimi naammassipput kalaallillu nerrrivimmi arsaarartartut Jerseymut arfineq marloriarlutik unammisussaallutik. Unamminerni siullerni tallimani kalaallit 2-3-mik kinguarmata unamminerit pissannganarnerat sivitsorneqarpoq.
Nerrivimmi arsaarartut unamminerit arfineq marlussaannut aalajangiisussamullu ingerlaqqissagunik arfinilissaanik unamminermi ajugaasussaapput. Qujanartumillu Nunarput ingerlalluarpoq, taamaalilluni angutit ileqarnatik semifinalerneranni Aqqalu Nielsenip Nunatta qalipaatai aappaluttoq qaqortorlu illersorlugu. Aqqalu Nielsenilli sapersarfimminik naapitsisimanini paasivaa unamminerillu siulliit pingasut ajorsarfigalugit unamminermi ajorsarluni.
Nerrivimmi arsaararnermi bronzennanniuttoqarneq ajormat semifinaalimi ajorsartut marluk 3-nngornermik avitseqatigiittarput. Taamaalillunili Nunarput Island Gamesimi siullermeertumik ujaminnalluni bronzennappoq.
Island Gamesimi timersuutini assigiinngitsuni 14-ini qeqertanit 24-nit peqataasoqarpoq.
Timersortartut 2000-it missaanniipput, taakkunanngalu 21-t Nunatsinneersuupput. Nunarput timersuutini assigiinngitsuni sisamani tassa nerrivimmi arsaararnermi, sulorarnermi, atletikkimi triathlonimilu peqataatitaqarpoq.
