Nunarput Island Gamesimi kuultinnattoq

Nunarput Gibraltarimi Island Gamesertoqarnerani siullermeertumik kuultinnappoq. Tassa eqimattakkaarluni sulorarnermi kalaallit Guernseymut ajugaapput.

Sulorarnermi tallimariarluni unammisoqartarpoq imaluunniit pingasoriarluni ajugaasoqaraangat naammassisarput.

Ataasinngornermi marlukkaarluni pissartanngorniuunneq sivisuvoq pissanganarluinnarlunilu, matumanilu Frederik Elsner aamma Nina Høegh-Møller ajugaapput.

- Misigisaq tupinnarnerpaavoq!, Frederik Elsner oqarpoq.

- 2009-mi aamma finaalernikuuvugut, Savalimmiunut unammilluta ajorsarluta, kisianni massakkut tupannartorujussuuvoq ukua aamma mixdoublertut, singlertut kakkannerpaat ilaanniikkamik. Kisianni holditut immitsinnut tapersersorluaratta taanna pingaaruteqarsimavoq, assorujussuaq. 

Ullumi sulorartoqaqqissaaq arpattoqarlunilu

Ajugaanersiornerat sodavandinik nerisassanillu pitsaasunik qatserneqartoq, Frederik Elsnerip oqaatigaa.

- Tamatta qasusorujussuuvugut sukataarnikuugatta. Kuultinnakkatta soorunami tulluusimaarnartorujussuuvoq misigisaq immikkuullarissoq. Taava naammassigatta aatsaat unnuap-qeqqata qeqqa angerlarpugut qasorujussuarlutalu. Nerivugut taava colatorluta tamatta eqqissiivilluta, Island Gamesimi sulorarnermik kultinnaqataasoq, Frederik Elsner oqarpoq

Kisimiilluni sulorarnerit ullumi aallartissapput unnugulu arnat 1500 meterimut arpassallutik, Johanne Nivé Møller tassunga peqataassaaq. 

Nunarput nerrivimmi arsaararnermi ataasinngormat aamma bronzennappoq.

Qeqertat 24-t timersuutini assigiinngitsuni 14-ini peqataapput, unammeqataasunilu 2000-it missaaniittuni 21-t nunatsinneersuupput. Taakku timersuutini ukunani sisamani peqataapput: Sulorarneq, nerrivimmi arsaararneq, atletiki triatlonilu.