Nunarput internetti atorlugu kilitsissiaqarnermit aarlerinartorsiortoq
Nunami allamiut qarasaasiatigut marserniarsarisartut danskit oqartussaasuisa suliffeqarfiutaasalu e-mailinik, allagaataannik isertuussanillu atuaaniarlutik marserniarajupput.
Kilitsissiaqarnerup aarlerinarnera annertuvoq, danskillu illersornissaqarfiata isertortumik paasiniaasartuisa ataanniittup, internettimi isumannaatsuunermik suliaqarfiup - Center for Cybersikkerhedip - tamanna nalaatikulavaa. Tamanna Nunatsinni aamma taamaattoq, pisortap Thomas Lund-Sørensenip nalilerpaa.
- Aarlerinarnerata tunngaviusumik assigiinnissaa ilimagaarput, qularnanngitsumik Kalaallit Nunaannut politikikkut annertuumik soqutiginnittoqarpoq, qarasaasiatigullu Kalaallit Nunaannut pinerlinniartoqarsinnaanera Danmarkimisulli ippoq, pisortaq oqarpoq.
AAMMA ATUARUK Nunatsinni internetsernermut isumannaallisaanermut annertusaaneq Danmarkimiit aaneqassaaq
Center for Cybersikkerhed Nunatsinnut tunngatillugu immikkut naliliinikuunngilaq, kisianni tassa aarlerinarnerata qaffasissusaa Danmarkimut aarlerinarneratulli ittoq nalilerneqarpoq.
Kalaallit suliffeqarfii pulaarsimagaat
Nunalli taakkua qanoq eqqoruminartigissusiat assigiinngitsuseqartoq, Thomas Lund-Sørensen isumaqarpoq. Nunatta assersuutigalugu nukimmik, imermik internettimik assartuinermilluunniit isumagineqarnera Nunatsinni suliffeqarfimmit oqartussamilluunniit ataatsimit isumagineqakkajuppoq.
- Kalaallit Nunaat qarasaasiatigut kilitsissianit saassunneqassappat, suliffeqarfik ataaseq marlulluunniit taamaallaat eqqornissaat pisariaqassaaq, Danmarkimili amerlanerit immaqa saassunneqaqqaartariaqassallutik.
AAMMA ATUARUK Norgemiut qaraasiakkut attaveqaataannik Kinamiut Ruslandimiullu saassussisinnaanerat aarlerisaarutigineqartoq
- Tamanna soorunami Kalaallit Nunaanni sillimaffigineqartariaqarpoq, Kalaallit Nunaannili suliffeqarfiit inuiaqatigiinnut pingaaruteqarnerit pingaartumik matumannga ukkataqartut nalunngilara, Thomas Lund-Sørensen oqarpoq.
Center for Cybersikkerhedip kalaallit oqartussaasui suliffeqarfiillu sapaatip akunnerata siuliani pulaarpai Nunatsinnilu sillimaniarnermut tunngatillugu oqaloqatigalugit.
Digitalimik sullissinermut aqutsisoqarfik qarasaasiatigut sillimaniarnermut inatsisissatut siunnersuummik suliaqaleruttorpoq, taanna Center for Cybersikkerhedimut suleqatigiissinnaanermik ilaatigut periarfissiisinnaavoq.
Kilitsissiaqarnerit saniatigut Kalaallit Nunaannut allamik aamma aarlerinartoqarpoq, tassa qarasaasiatigut marserniartut allat soorlu pinerluuteqarniarlutik suliffeqarfinniit namminersortuniillu aningaasannanniarsinnaapput
