Nunaqarfinni aqutsisut ataatsimeeqatigineqarlik

Thimothæus Petersen Kullorsuarmi Upernaviup avannaanniittumi najugaqarpoq. Kullorsuaq nunaqarfiit inuttusiartortut ikittuinnaat ilagaat.  

- Nunaqarfinni inuerukkiartortuni illuliassanik ikilisaanissaq kisiat oqaluuseriunnaarlugu, sumiiffiillu siuariartortut nutaanillu suliffissaqartitsisut kisiisa illuliorfigineqarsinnaanissaat piunnaarlugu, oqaluuserineqartariaqarpoq nunaqarfinni inuerukkiartortuni suliffissanik nutaanik qanoq pilersitsisoqarsinnaanersoq, Thimothæus Petersen erseqqissaavoq, nunatta nunaqarfiisa inuttunerpaartaata Kangerlussuup 513-nik inullip tullersortaani 444-nik inulimmi najugaqartoq.

Ineqarnermut Naalakkersuisup Jens B. Frederiksenip ineqarneq pillugu ingerlatsinermut nassuiaat sapaatip akunnerata tulliani saqqummiuttussaavaa. Nassuiaammi ilaatigut erseqqissarneqarpoq nunaqarfinni inuerukkiartortuni inissiat pigineqartut ikilisinneqassasut.

Thimothæus Petersen isumaqarpoq nunaqarfiit naammattumik imissaqanngitsut tunisassiorfeqalersinnaasut imaanit imeq tarajuiaammik atortulerluni nalinginnaasumik imeritinneqalersinnaappat.

- Nunaqarfippasuit taamaattumik atortulerneqartuuppata tunisassiorfilerneqarsinnaassagaluarput -  inuussutissarsiorneq inerisarneqarsinnaalluni. Immap tarajuanik piiaatit nunaqarfinni arlaqaqisuni maannakkut atorneqarput, Thimothæus Petersen, nunaqarfimmi ukiuni kingullerni arfineq marlunni 39-nik inoqarnerulersimasumi najugaqartoq oqarpoq.

Thimothæus Petersen ugguarpoq Qeqertat, Qaanaamit 40 kilometerinik ungasitsigisumiittoq,  ukiuni kingullerni inuttusiartortoq, elværkitaartinneqanngimmat.

- Nunaqarfiup eqqaa qaleraleqarfissuusoq ilisimaneqarpoq. Qaleraleqarfissuaqarmat Naalakkersuisunit tapersersorneqarsimasariaqaraluarpoq nunaqarfiup innuttaanut 29-nut suliffissarpaalussuarnik pilersitsisoqarsinnaassagaluarmat, Thimothæus Petersen erseqqissaavoq.

Inatsisartuni ilaasortaq Kristian Jeremiassen, S, Qeqertat elværkeqalernissaannik siorna siunnersuuteqarpoq. Siunnersuulli Naalakkersuisunut ilaasortamit Jens B. Frederiksenimit akuerineqanngilaq. Akuersissuteqanginnerminut ilaatigut tunngavigalugu, akuerineqarpat, Nukissiorfiit aningaasanut inatsimmi amerlanerungaartunik aningaasaliiffigineqartariaqarneranik kinguneqarsinnaasoq.

Kullorsuarmi Upernavik Seafood qaleralinnut tunitsiveqartitsivoq.

Thimothæus Petersen isumaqarpoq Kullorsuup ukiuni kingullerni inuttusiartorneranut inuusuttut amerlaqisut meerartaartarneri pisooqataalluinnartoq.

Kalaallit Nunaanni Naatsorsueqqissaartarfiup kisitsisaatai naapertorlugit nunaqarfinni arfineq marlunni innuttaasut 2005-mit 2012-mut amerleriartorput.  Sermiligaaq – marluk, Kommuneqarfik Sermersooq. Kangerlussuaq – sisamat, Qeqqata Kommunia. Oqaatsut -  tallimat. Upernavik Kujalleq – 11-it. Kullorsuaq – 39-it. Innaarsuit – marluk aamma Qeqertat – arfineq marluk. Nunaqarfiit pineqartut kingulliit tallimat Qaasuitsup Kommunianiipput.

Kommune Kujallermi nunaqarfinni tamaginni innuttaasut amerleriartunngillat.