Nunaqarfik ukiormanna iluarsartuunneqarsinnaanngitsoq
Tassaarsuaqarnerani Nuugaatsiaq eqqugaanerpaavoq, ajunaarnersuaqarmallu inuit sisamat ajunaarsimasutut politiit nalunaarutigaat.
Eqqugaasut angerlaqqissinnaaneranut piffissaq suli sivisusinnaavoq.
Nuugaatsiamilu ukioq manna aseruatitersimasut iluarsartuunneqarsinnaanngitsut,
Qaasuitsup Kommuniani ingerlatsivimmi pisortaq Sivso Dorph oqarpoq.
AAMMA ATUARUK Nuugaatsiap tassaarsuarmit eqqugaanera takuuk
- Nuugaatsiarmiut uternissaminnut periarfissaat massakkut imaaliallaannarsinnaanngilaq, suli ulorianartutut nalilerneqareerpoq, taamaattumik Nuugaatsiaq Illorsuillu matoqqatinneqarput, Sivso Dorph oqarpoq.
Nuugaatsiarmiullu sumi najugaqarsinnaannerat paasiniarneqarpoq:
-Taakkua sumi najugaqarsinnaannerat misissorlugu paasiniarneqarpoq, qimagussorneqartullu ukiivissaannik sumi naleqquttumik nassaartoqassanersoq apeqqutassaaq, tassa Nuugaatsiarmiut naggataatigut namminneerlutik aalajangertussaavaat sumut nikeriassanerlutik, Sivso Dorph oqarpoq.
Illorsuarnut utertoqarsinnaanngilaq
Illorsuarni inuttaasut aamma suli utaqqisariaqassapput.
-Illorsuarnut massakkut utertoqarsinnaanngilaq, qaqqaq pillugu ilisimasallit naatsorsuisimanerat tunngavigalugu mallit annguttussat portuallaartussaammata, taamaattumik Illorsuarnut utertoqarsinnaanngikkallarpoq, Sivso Dorph oqarpoq.
Nuugaatsiaq Arktisk Kommando/Palle Lauritsen
Angallat suli amigaatineqartoq
Kalaallit Nunaanni Politiit tallimanngormat aamma nalunaarutigaat nunaqarfinni Niaqornani, Saattuni, Ukkusissani, Ikerasammi, Qaarsuni aamma Uummannami innuttaasut naviarnartorsiorsinnaanerannik naliliisimaneq atuukkunnaartoq.
AAMMA ATUARUK Aasiammiut tikilluaqqusilluaqaat
Niaqornarmiut ilaat Aasianniittut 22-upput, Niaqornarmiut ilaat aamma Uummannamiillutik.
Niaqornamiullu uteqqinnissaat anguniarlugu maanna misissuisoqartoq, Qaasuitsup Kommuniani ingerlatsivimmi pisortaq oqarpoq.
- Qimagussorneqarsimasut Aasiannit Niaqornap tungaannut ingerlanneqarnissaannut umiarsuarmik
attartorsinnaasatsinnik massakkut ajarlerpugut, Targat mikivallaarput aqqutaanilu orsertariaqassallutik, Najaaraq Ittulli maanna Uummannap eqqaaniittup kujammukarnissaa utaqqivarput, Sivso Dorph nassuiaavoq.