Aasiammiut tikilluaqqusilluaqaat

Inuppassuaqaraluarluni inuit attortisimanerup pianik nipaapput, KNR-imi tusagassiortoq, Jens Thorin oqaluttuarpoq.

- Sakkutuut umiarsuaat, Ejnar Mikkelsen tikilermat Aasiarmiorpassuit 100-200-ut missaanniittut tikilluaqqusiartorlutik niuffiukaapput. Tikimmatalu nippaattumik ilassiorlutik tikilluaqqusipput, tikittullu aamma nipaaqaat attortisimasut malunnarlutik, Jens Thorin oqarpoq.

Nangillunilu oqaatigaa qimagussorneqarlutik apuunneqartut ullumi ataasinngornermi nalunaaqutaq marlunut suli umiarsualivimmiittut, ilinniarnertuunngorniarfiulli nerisarfitoqaanukaanerarlugit.

- Tassani nalunaarsorneqassapput, pisariaqartitsisullu arlaatassaminnik atisanik tuniorarneqassapput, taavalu aamma nereqqaarallassapput ullup qeqqasiorlutik. Taamaalereerunillu inigisassaminnut agguataarneqassapput, Jens Thorin taama oqarluttuarpoq.

AAMMA ATUARUK Ataqqinartorsuup dronningip eqqugaasut misiginneqatigai

Qimagussorneqartut 49-uusut pingasunut illusisinneqassapput tassa, Ilinniarnertuunngorniarfimmi ilinniartut najugaqarfianni aamma Namminersorlutik Oqartussat atuarfiutaanni, innarluutillit atuarfiata najugaqarfiani taavalu kommunep inuussutissarsiornermi ilinniarfiata inissiaataanni najugaqartinneqassapput.

-Aasiammiut qanoq attortisimanerat arlaatigut malunnarpa? 

-Aasiammiut attortisimapput, malunnarput assut ammmalu Aasianni najugalippassuit aamma avannaani uummannap eqqaani assut attortisimallutik aammalu maani piareersimasorpassuit isiginnaarlugit qutsannarput, piareersimallutik ikiuullutik kommunellu piareersimatitaanut upalungaarsimatitaanut saniatigut arlaatigut ikiuunnissaminnut piareersimasorpassuit takussaapput, Jens Thorin oqarpoq.

AAMMA ATUARUK Uummannap sulluani angalasoqassanngitsoq