Nunaqarfiit inuerukkiartortut illuliorfigineqassanngillat
Ineqarnermut Naalakkersuisup Jens B. Frederiksenip ineqarneq pillugu ingerlatsinermut nassuiaat sapaatip akunnerata tulliani saqqummiuttussaavaa.
Nassuiaammi ilaatigut erseqqissarneqarpoq sumiiffinni ineriartorfiusuni nutaanillu suliffissanik pilersitsiffiusuni nutaanik inissialiortitsisoqassasoq, akerlianik illoqarfinni nunaqarfinnilu inuerikkiartortuni inissiat ikilisarneqassassut.
"Sumiiffinni ineriartorfiusuni nutaanillu suliffissaqartitsiviusuni inissialiortitsisoqassaaq, kisiannili illoqarfinni nunaqarfinnilu inuerukkiartortuni inissiat pigineqartut ikilisarneqartussaallutik", Ineqarnermut Naalakkersuisoq Jens B. Frederiksen, ineqarneq pillugu ingerlatsinermut nassuiaammi allappoq.
Taama nalunaartoqarnera nunaqarfimmiut nikalluallaatigaat.
- Tamanna immikkoortitsineruvoq nunaqarfinni ineriartorfiunngitsuni nunaqarfimmiut nutaanik illuliorsinnaatitaajunnaassammata, nunaqarfiit peqatigiiffianni Kanunupe-mi siulittaasoq Jens Kristian Therkildsen, Ikerasammeersoq oqarpoq. Erseqqissarpaalu nunaqarfimmiut sumiiffinnut ineriartorfiusunut suliffissanillu nutaanik pilersitsiffiusunut nuuttariaqarnissaannik kinguneqassammat.
Nunatsinni nunaqarfiit 60-it missaanniipput. Kalaallit Nunaanni Naatsorsueqqissartarfiup kisitsisaatai naapertorlugit nunaqarfinni arfiniliinnarni innuttaasut ukiuni kingullerni amerliartorput. Soorlu Kangerlussuarmi innuttaasut sisamanik amerleriarsimasut, 509-niit 513-nut, Oqaatsunilu Ilulissat avannaani tallimanik, 45-niit 50-nut.
Nunaqarfiit amerlanersaanni, soorlu Qeqertarsuatsiaani najugallit nunaqqatigisimasaminnut 73-nut 2005-mit 2012-mut qimaguttunut inuulluaqqusisariaqarsimasut, Attulu Kangaatsiap kujataaniittoq 63-it qimassimavaat.
- Nunaqarfiit amerlanersaanni innuttaasut ikiliartoraluartut, taamaattoq politiikkerinit eqqaamaneqartariaqarpoq innuttaasoqarmat nunaqarfimminnik qimatserusunngitsunik, Jens Kristian Therkildsen oqarpoq.
Kalaallit Nunaanni Nunaqarfimmiut Peqatigiiffiata siulittaasua oqaluttuarpoq nunaqarfimmiut amerlasuut illutaarnissaminnik pisariaqartitsisut, soorlu aamma amerlaqisut illunik nutaanik naleqquttunik illoqalernissaminnik pisariaqartitsisut.
- Nunaqarfinni ineriartorfiunngitsuni nutaanillu suliffissanik pilersitsiffiunngitsuni innuttaasut illutaarnissaminnik pisariaqartitsisut, nunaqarfimmillu qimatserusunngitsut qanoq pineqassappat, Jens Kristian Therkildsen aperivoq, erseqqissaallunilu nunaqarfinni ullutsinnut naleqqutinngitsunik illorpassuaqarmat typehusenik pineqartartunik.
- Isumaqartoqarsinnaavoq ineqarneq pillugu ingerlatsinermut nassuiaat tassaasoq nunaqarfinnik inuerusaanissamut sakkugitinniarneqartoq. Neriutigaara nunaqarfimmiut nassuiaat tusarunikku uippalliutigissanngikkaat, Jens Kristian Therkildsen erseqqissaavoq.
