Nunap Inoqqaavisa Ataavartumik Oqaloqatigiittarfianni 16-issaanik ataatsimiittut

Ataatsimiinneq nunap inoqqaavinit nunarsuarmi tamaneersunit peqataaffigineqarpoq, ukioq mannalu peqataasut 2.000-it missaanniipput.

Nunap Inoqqaavisa Ataavartumik Oqaloqatigiittarfiata siunertaraa nunap inoqqaavinut tunngasunut ataavartumik isummersoqatigiiffeqarnissaq. Tassanngaanniillu kaammattuutigineqartut Naalagaaffiit Peqatigiit suliniaqatigiiffiinut allanut Naalagaaffiit Peqatigiillu ataatsimeersuarnerannut ingerlateqqinneqartarput.

Nunap inoqqaavisa pisinnaatitaaffii pillugit Naalagaaffiit Peqatigiit isumaqatigiissutaata  akuersissutigineqarnerata ukiunik qulinngortorsiornera ukioq manna nalliuttorsiutigineqarpoq. Nakorsaq arnaq, Mariam Wallet Aboubakrine, Afrikami Malimeersoq ataatsimiinnermi siulittaasussatut toqqarneqarpoq.

Toqqarneqarnerminut atatillugu oqalugiarami Nunap inoqqaavisa pisinnaatitaaffii pillugit Naalagaaffiit Peqatigiit isumaqatigiissutaat nunarsuarmi nunanit atortuulersinneqarnissaa pingaaruteqarluinnartuusoq erseqqissaatigaa. Nunap inoqqaavisa pisinnaatitaaffiisa tamakkiisumik akuerineqarnissaat pingaartuuvoq, siulittaasoq taama oqarpoq.

Henriette Rasmussen eqqaaniarneqarpoq

Nunap inoqqaavisa pisinnaatitaaffiinik ilungersuutillit qanittukkut toqukkut peerussimasut ataatsimiinnerup ammaanersiorneqarneranut atatillugu eqqaaniarneqarput.

Taakku ilagaat Henriette Rasmussen. Ilaatigullu Inuttut pisinnaatitaaffiit pillugit nunarsuarmioqatigiit 1992-imi ataatsimeersuarneranni siunnersuutigisaa, ukiullu qulit qaangiunnerini Nunap Inoqqaavisa Ataavartumik Oqaloqatigiittarfiannik pilersitsinermut aqqutissiuussisoq eqqaaneqarpoq.

Aamma Henriette Rasmussenip Naalagaaffiit Peqatigiit Sulisoqarneq pillugu Suleqatigiiffianni Genevemiittumi atorfeqarnermini arnat meeqqallu pisinnaatitaaffii pillugit ilungersuuteqarsimanera immikkut eqqaaneqarpoq.