Nunap immikkoortuinut sinniisoqartitsineq nikisitsivallaanngilaq
Aviisip naatsorsuinera naapertorlugu, kommunimi politikerinit nunap immikkoortuinut sinniisutut toqqarneqartunit 18-init 16-it malittarisassaq akerleriissutaasoq isumalluutigisimanngikkaluarunikkuluunniit kommunalbestyrelsimut qinigaasimassagaluarput.
Kommuninut qinersinermi taasinerit tamarmik oqimaaqatigiissimagaluarpata kommunimi politikerit marluinnaat qinigaanngitsoorsimassagaluarput.
Tamanna Ivittuunut sinniisumut kisimiilluni qinigassanngortittumut, Anni K. Rasmussenimut, 17-inik taasiseqarluni Kommuneqarfik Sermersuumi kommunalbestyrelsimut qinigaasumut, atuuppoq.
Immikkut malittarisassaq atuutinngikkaluarpat kommunalbestyrelsimi inissaq Nuummi Inuit Ataqatigiinneersumut, Naja Lundimut, 86-inik taasiseqartumut, tutsinneqarsimassagaluarpoq.
Tamanna aamma Kangaatsiamut sinniisumut, Siumumeersumut, Ole Inûsútok' Frederiksenimut, 74-inik taasiseqarluni Qaasuitsup Kommuniani kommunalbestyrelsimut qinigaasumut, atuuppoq.
Taanna ammasumik ilaasortanngorniuttoqarsimagaluarpat Siumut tunuliaqutaralugu qinigassanngortittumit allamit, Saattormiumit, Apollo Mathiassenimit, 122-nik taasiseqartumit, ajorsartinneqarsimassagaluarpoq.
Malittarisassat naapertorlugit nunap immikkoortuinut sinniisut kommunalbestyrelsimi ilaasortaanerminnik attassiinnarsinnaapput, kommunip iluani sumiiffimmut allamut nuukkaluarunilluunniit.
