Nunatta eqqartuussisuunera kræftimik toqquteqartoq

Søren Søndergård Hansen Københavnimi Rigshospitalimiitsilluni nuliani ilagalugu toquvoq.

Søren Søndergård Hansenip nuliani, ernitik inersimasut marluk ukuartillu qimappai.

Nunatta Eqqartuussisuuneqarfiani pisortap tullia, Anne-Sophie Abel Lohse Søren Søndergård Hansenip napparsimanerminik nalunaaruteqarluni sulinngiffeqalernerani eqqartuussisuunerugallartussatut toqqarneqarpoq, taassuma nutaamik eqqartuussisuunerulertussamik toqqaasoqarnissaata tungaanut atuuffik tigummiinnarallassavaa. Nunatta Eqqartuussisuuneqarfianut danskit eqqartuussisuuneqarfianit eqqartuussisoq alla suliartortinneqarallarpoq.

Søren Søndergård Hansenip Nunatta Eqqartuussisuuneqarfiani ukioq manna ukiuni 20-ni eqqartuussisuunertut atuuffeqarnini nalliuttorsiutigaa. Eqqartuussisuunertut atuuffeqalinnginnermini nunatsinni eqqartuussivinni sulivoq tassanilu suleqatiminut malunnaateqangaarsimalluni.

- Søren Søndergård Hansen kalaallit eqqartuussiveqarfiisa Nunatsinnilu Eqqartuussisuuneqarfiup ineriartortinneranut sunniuteqangaatsiarsimavoq, eqqartuussisuunerugallartoq, Anne-Sophie Lohse KNR-imut oqarpoq.

Søren Søndergård Hansen eqqartuussiveqarnermut ataatsimiititaliami nunatsinni eqqartuussiveqarnikkut nutarterisoqarmat ukiuni qulini suleqataavoq.
Søren Søndergård Hansen, nersornaammik nuimasumik ridderkorsimik 1. grad af Dannebrogsordenimik 2011-mi saqqarmiulerneqarpoq.

AAMMA ATUARUK Nunatta eqqartuussisuunera illersuisunit nersorneqartoq