Nunanit assigiinngitsuneersut kalaallit inngerusianik atueqatigiissasut
NIpilersorneq kikkulluunniit paasisinnaasarigaat nunarsuarmiullu tamarmik nipilersornikkut oqaloqatigiissinnaasut oqaatigineqartarpoq.
Tamanna Sisimiuni ulluni makkunani misilittarneqarpoq, tassami Palæstinamit, Zimbabwemit Sápmiillu nipilersortartut nipilersoriaatsiminnik ataatsimoortitsiniarlutik katersuupput.
Kalaaleq qilaatersortartoq, Nuka Alice suliniuteqartuuvoq.
Arnaannaat
Nipilersortartut sisamat Nuka Alicep nammineerluni inngerusiaanik nutaanngortitsissapput.
Nuka Alicellu nipilersortartut arnat pingasut pilersitseqatiginissaat qilanaaraa:
- Arnat taakku suliniummi peqataanerat assut maniguuffigaara. Naak nunat inoqqaajusutut kulturigut assigiinngikkaluartut oqaluttuaatigut misigisagullu assigiiffeqarput, taanna oqarpoq.
Nuka Alicellu nipilersortartut inngerusiaminik nutaanngortitseqatissami arnaanissaat pingaartissimavaa.
Nipilersortartulli kisimik arnaanngitsut, taanna oqarpoq:
- Suliniut arnaannarnik inuttaqarpoq, eqqumiitsuliortut, suliniummi aqutsisoq, pisunik assiliisoq, nipilerisoq, produceri, naatsorsuusiortoq angalatitsisorlu tamarmik arnaapput. Isumaqarpunga suliassaqarfiusumi angutaanerusunik inuttaqarnerusartumi asseqanngilluinnartumik iliuuseqarluta.
Annerusumik aallarniutaassasoq
Eqqumiitsuliornermik suliniut kulturikkut illorsuarmi Taseralimmi aqagu tusarnaartitsissutigineqassaaq.
Sisimiunilu innuttaasut nipilersortartut pingasut sapaatip akunnerani ataatsimut qanoq pilersitsisimanersut tusagaqarfigisinnaavaat.
Nuka Alicelli tamanna nipilersortartunut sismanut nipilersornikkut suliaqarnermut annerusumut aallarniutaaginnarnissaa neriuutigaa.
Inngerusiat nutaatut suliarinerisa saqqummersinneqarnissaat, tusarnaartitsissutigineqarnissaat, suliniullu pillugu piviusulersaaruteqalernissaa neriuutigineqarpoq.
