Qooqquni qilaatersorneq: Kulturerput takutikkaangatsigu imminut unnersiutigisarpugut

Nuup kangerluani pisarneq malillugu sapaatip akunnerata naanerani Qooqqut Festivalertoqalerpoq, eqqumiitsuliortullu isiginnaariartullu pinngortitamut alianaatsumut peqataajartorput.

Ukioq manna Alaskami Tooksook Bayimit peqataasoqassaaq. Tassa Byron Nicholai, taanna nipilersortartuuvoq, oqaatsitillu Yupiit atorlugit taalliortarluni.

Taassuma erinarsuutit YouTubemut 2014-mut ikkuttalerpai, videolianilu pillugit tusaamaneqarlualertupallalluni, taassumali qitinnermut erinarsornermullu soqutiginninnera tamanna sioqqutingaatsiarlugu aallartippoq:

- Arfinilinnik arfineq-marlunnilluunniit ukioqarlunga qitittalerpunga. Atuarfimmi ilinniagassat ilagaat, tamatumalu kingornali qitittalerlungalu qilaatersortalerpunga, taanna oqarpoq, nangillunilu:

- Eqqaamavara qitinnermi festivalertoqaraangat isigisoqannginnerani qilaatersorniapallattarpunga. Aanaama taamaalioqqujunnaartaraluarpaanga. Kisianni qilaatersuinnarusuppunga. Kinaassutsima ilagaa.

Siuaasani pingaartikkai

Siuaasami anersaavannik attassinissi Byron Nicholai-ip pingaartilluinnarpaa.

Naallu taanna r&b-mik nipilersortariaaseqaraluarluni nipilersuusiai naggueqatigiit inuit kulturiannik tunngaveqarput.

Nunap inoqqaavinik ukiorpassuarni naqisimanninnermut akerliunini ersersinniartarini taanna oqarpoq:

- Isumaqarpunga kulturip nunarsuarmioqatitsinnut takutinnissaa pingaaruteqartorujuusoq, inuimmi ilaasa qitittariaatsip isumaa paasisinnaanngilaat, taamanersuarmi oqarfigineqarnikuuvugut qitittarnerput ajortuusoq paasisimanngilaammi qanoq isumaqarnersoq, taanna oqarpoq, nangillunilu:

- Ajoqusiingaatsiarpoq. Inuit taamaalillutik imminnut annaapput. Qitikkaangatta kulturitsinnillu takutitsigaangatta imminut, kulturitsinnik suminngaanneernitsinnillu unnersiutiginnittarpugut. Tamanna kinaassusiliisarlunilu nammineq naleqassutsimik misigisimatitsisarpoq.

Taallanik tusarnaartitserngaassasut

Byron Nicholai-ip eqqumiitsuliortut nunatsinneersut nunanillu tamalaaneersut Qooqquni ulluni tulliuttuni nutaanik taallioqatigissavai, taakkulu arfininngorpat unnukkut tamanna tusarnaartitsissutigissavaat.

Byron Nicholai-ili aatsaat siullermeertumik nunatsinniinngilaq.

Taassumalu nunatsinniinnini nuannareqaa. Pingaartumillu kulturit marluk ukiut qulikkaat ingerlaneranni atassutigilersimasaat pillugu:

- Kalaallit Nunaat nuannareqaara. Qaaqquneqaraangama naaggaanngisaannarpunga. Angerlarsimaffik qimallugu angerlarsimaffiuvoq, taanna oqarpoq, nangillunilu:

- Kalaallinut assingusoraanga. Aamma ilissi Alaskameersunut uagutsinnut assinguvusi. Taamaammat angerlarsimasutut misigisimavunga. Kalaallit Nunaat nuannareqaara, inuit, nerisassat nunataalu nuannareqaakka. Imaq takuuk eqqiluitsorujussuuvoq. Angerlarsimaffinniit ungasittorujussuugaluarlunga angerlarsimasuusilaarpunga.