Nunani tamalaani nunatta akuunissaa assortuussutigaat
Taava Danmarki kingusinaartinnani sooq suli iliuuseqanngila? Dansk Folkeparti sinnerlugu Folketingimut ilaasortaq Søren Espersen, Statsministerimut aperivoq.
Kina siuttuussanersoq Folketingimi ippassaq tassa oqaluuserineqarpoq. Dansk Folkepartiip Kalaallit Nunaannut tunngasunut oqaaseqartartua Søren Espersen, Statminister Helle Thorning-Schmidtilu oqaloqatigiipput.
Danmarkimi Naalakkersuisut Kalaallit Nunaanni aatsitassat pillugit soqutiginninnerulernissaat piffissanngortoq, Søren Espersen isumaqarpoq.
Danmark nunalluunniit nunani avannarlerneersut allat Kinamik unammillernerulersinnaasuuppata, taava sulisoqarnermi inuuniarnikkut akissarsiatigullu atukkat tunngaviinik ajoqusiisoqassanngikkaluarpoq, Søren Espersen uparuaavoq.
- Nunani avannarlerni ilisimasavut sulisorisavullu atorluarneqarnissaat uagutsinnut aamma pingaaruteqarpoq. Atugassarititat ajunngippata, taava sulisoqarnikkut pissutsit pitsaasut atuutissagaluartut takorloorneqarsinnaavoq. Nunani avannarlerni pissutsit atuuttut matumani takorloorpakka. Imaassinnaasormi Kinamiut ullut ilaanni suna tamarmi tiguarsimallugulu oqartussaaffigilersimagaat, Søren Espersen Folketingimi oqarpoq.
Danmarkip Kalaallit Nunaatalu suleqatigiinnerulersinnaanissaat eqqarsaatigalugu Kalaallit Nunaannit qisuariartoqaqqaartoqarnissaata utaqqineqarnissaa pissusissamisoornerussasoq, Statsministerip oqaatigaa.
Suleqatigiissitaliornikkut tamanna pisinnaasoq Statsministerip takorloorpaa, soorlu Kuupik V. Kleist taama siunnersuuteqareersoq. Danmarkimilu naalakkersuisut isumaat ersarippoq:
- Ammavugut, oqaloqatiginnikkusullutalu. Kalaallit Nunaallu tamanna pillugu oqaloqatigiinneq ingerlajuarpoq, peqataarusuppugullu, Helle Thorning-Schmidt erseqqissaavoq.
Akissulli taanna Søren Espersenip naammaginngilaa:
- "Oqaloqatiginnikkusuppugut". Tamanna kisiat kissaatiginngilara. Statsministerimununa paasitikkusukkiga Danmarkimut, nunanut avannarlernut, Danmarkimi suliffeqarfinnut, Danmarkimiillu aningaasaleerusuttunut tamanna iluaqutaassasoq, maannangaarlu aallartittariaqartugut, utaqqiinnarnata, Søren Espersen oqarpoq.
Statsministerilu ima akivoq:
- Utaqqiinnanngilagut. Kalaallit Nunaanni aalajangikkat ataqqivavut, ataatsimiititaliamilu ilaalernissatsinnut piareeqqavugut, ataatsimiititaliamik taamaattumik pilersitsisoqassappat. Kalaallilli Nunaanniit iliuuseqartoqaqqaarnissaa soorunami ataqqisariaqarparput, Statsminister Helle Thorning-Schmidt oqarpoq.
Nunatsinni aatsitassarsiornermi Danmarkip Kalaallit Nunaatalu suleqatigiilersinnaanissaat pillugu Kuupik V. Kleistilu piaarnerpaamik oqaloqatigiissinnaanissartik, Statsministerip ujartorpaa.
