Nunani avannarlerni ministeriunerit Islandimi ataatsimiinnerinut Aleqa Hammond peqataavoq

Naalakkersuisut siulittaasuat Aleqa Hammond, Ålandimi Savalimmiunilu ministeriunerit peqatigalugit nunani avannarlerni ministeriunerit siullermeertumik ukiumoortumik ataatsimeeqatigiinnerannut ippassaq peqataavoq.

Allattoq Karsten Sommer

maajip 28-at 2014 05:19

Ataatsimiinneq Islandimi Akureyrimi pivoq, Islandip ministeriunera nunani avannarlerni suleqatigiinnermut ukiormanna siulittaasutut ataatsimiinnermut qaaqqusisuulluni.

Kalaallit Nunaat, Savalimmiut Ålandilu ataatsimoorlutik aamma nunat akornanni suliassaqarfinni attuumassuteqarfiusuni nunani avannarlerni suleqatigiinnermi, tamanna Nunani Avannarlerni Ministerit siunnersuisooqatigiivisa avataanni ingerlanneqaraangat, peqataanissanissamik kissaateqarlutik saqqummiussipput.

Ministeriunerillu siunnersuummut akuersaarnerat Aleqa Hammondip nuannaarutigaa.

- Piffissaq iluatsillugu Islandimi naalagaaffimmi ministeri qutsavigerusuppara, pissutigalugu aasaanerani ileqquusumik ataatsimiinnerminnut atatillugu naalagaaffimmi ministerit oqaloqatiginissaat pillugu nunat namminersortunit qangalili kissaataasoq piviusunngortimmagu, Naalakkersuisut sulittaasuat oqarpoq.

- Nunani Avannarlerni Ministerit siunnersuisooqatigiivisa sulineranni uagut ulluinnarni peqataanitta takutippaa, siunissami politikkikkut Nunani Avannarlerni Ministerit siunnersuisooqatigiivinut suliakkiisoqaraangat, naalagaaffiit naalakkersuisuinut siulittaasut isumaliutersuuteqarneranni peqataasarnissarput aamma pingaaruteqartoq, Aleqa Hammond oqarpoq, Danmarkillu Nunat Avannarliit siunnersuisoqatigiivi aappaagumit siulittaasuuffigilerpagit nunatta qaaqquneqarnissaa siulittaasutullu 2015-imi aasaanerani ataatsimiinnissamut qaaqqusinissaa qilanaaralugu.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.