Nuna ikuallattoq: Nunamut kapuutit 50-it ullumi apuutissasut

Sisimiut avannamut kangiatungaani nuna ikuallattoq suli ikumavoq. Qujanartumilli illuaqqat ulorianartorsiorunnaaqqapput.

Taama Qeqqata Kommuniani upalungaarsimasut pisortaat, Ole Kreutzmann, oqarpoq.

Qeqqata Kommunianit nunamut kapuutit 30-t nunami ikuallattumi qamisaanermi maannakkut atorneqarput, taakkua nunamut kappunneqartarput, issumullu ikumasumut imermik imiissutigineqartarlutik. Issormi nunap iluani ikumajuarami suli ajornartorsiortitsivoq, qamivissorneqannikkunilu ikummattuartaqattaarsinnaavoq.

AAMMA ATUARUK Qeqqata Kommunia: Pinngortitami inneq mianersuullugu

Danmarkimi upalungaarsimanermut ataatsimiititaliarsuup qatserisartut 38-t Sisimiunut aallartitai tikereernikuupput, qamisaanermilu atortussat ilaat nunamut kappunneqartartut 50-it ullumi tikiunneqassapput. Taakkulu Issittumi Sakkutooqarfik suleqatigalugu Kangerluarsuk Tullermut assartorneqassapput.

- Tassa taakkua ullumikkut tikittussat taamaalillugit aamma ikkussuunneqassapput, taava avannamut kangimut siaruarnissaa unitsinneqassaaq, Ole Kreutzmann oqarpoq.

Qaqqap qaavani nuna ikuallattoq suli ikumavoq. Taannami qatserisartut maannamut qamissinnaasimanngilaat.

- Taannalu Beredskabsstyrelsip dronianik nakkutigineqarpoq, taamaalillugu qulaatungaaninngaanniit isiginnaaqqissaarsinnaallugu, Ole Kreutzmann oqarpoq.

Silassamik ilimasaarut malillugu Sisimiuni tallimanngornermi siallerniarpoq, kisianni qamisaasut kissaatigisinnaasaattut annertutiginngitsumik.

- Ikuallattoq taama sialuup annikitsigisup qamikkunnanngilaa, taamaattumik naatsorsuutigaarput killiliussatta iluani taanna ikumareersoq suli ikumagallassasoq, Ole Kreutzmann Oqarpoq.