Qeqqata Kommunia: Pinngortitami inneq mianersuullugu

Pinngortitami inneq mianersuullugu.

Sisimiut avannamut kangia’tungaani qaqqami ikuallanneq qaammat ataaseq sinnerlugu ikumareersorlu Qeqqata Kommuniani upalungaarsimasut taama kaammattuipput.

Kangerluarsuk Tulliup qinnguani suli ikuallattoqarpoq.

AAMMA ATUARUK Brandchef til frivillige: Tak er kun et fattigt ord

Sivisuumik siallersimanngimmat pinngortitaq panertorujussuuvoq. Taamaattumik pinngortitami inneq atorniaraanni mianersorluinnartariaqarpoq. Kommunip innutaasut pinngortitamilu pisuttut qinnuigai pinngortitami innermik atuinngilluinnaqullugit. Kisianni killulerluni iganiaraanni ikumatitsivik eqqaalu assanneqassaaq ikumatitallu saniani imeq piareersimatinneqassalluni inneq qaminneqapallanniassammat.

Siunnersuutitsialaat arfinillit

Qatserisart danskit 38-t Upalungaarsimanermut Aqutsisoqarfimmeersut qatserinermut atortunik 13 tonsinik oqimaassusilinnik nassarlutik Sisimiunut tikipput. Piumassutsiminnik sulisut 25-t qatserinermut ikiuussimasut taarsissavaat.  

Inneq qatserisartunit opiumassutsiminnillui suleqataasunit arlaleriarluni qaminneqartaraluarpoq, innerli nunami issoqarfiusumi aamaarusaaginnarpoq, anorillu sakkortuup akuttunngitsumik  ikummarteqittarpaa.

AAMMA ATUARUK Pisuttut pingasut Issittumi Sakkutooqarfimmit annaanneqartariaqartut

Politiit naapertorlugit ikuallanneq pujoorivimmi aalartissimavoq, taamaattumillu kommuni ukuninnga siunnersuuteqarpoq: 

Igitanik pinngortitami ikuallaasoqassanngilaq.
Igitassatit illoqarfimmut nassakkit, pingaartumik igalaamerngit ikuallassinnasullu allat.
Ikumatitsileruit mianersorluarit.
Pisariaqarluinnanngippat ikumatitsissanngilatit.
Pinngortitami sikaritsikunik igitsissanngilatit.
Igalaamerngit aseqquinik nassaruit tigullugit nassakkit. Tamaakumi aamma ikuallatsitsilersinnaapput.