Nunaminerals ilungersunartorsiorpoq
NunaMineralsimut piginneqataassutit naleerutseriarlugit nammineq aqulerniarlugu, Naalakkersuisut isumaliuuteqarput. Taamaalippat aningaasaliisut sinnerisa aningaasaliissutitik annaassavaat.
Nunamineralsip siulersuisuini siulittaasoq Birks Bouvaird isumaqarpoq, taamatut niuerneq pitsaassanngitsoq, Naalakkersuisullu aatsitassarsiornerup aallarteqqinnissaannik kissaataannut naapertuunngitsoq.
Suli aningaasaleerusuttoqarpoq
Siulersuisummi siulittaasuat isumaqarpoq, Naalakkersuisut aatsitassarsiortitseqatigiiffik ingerlaannartippassuk, suli aningaasaleerusuttoqartoq.
- Aningaasarsiornerup aallartilluaqqinnisasata tungaanut ingerlanissatsinnut atugassatsinnik arlaannik pisariaqartitsivugut. Aamma ilisarisimasaqarpunga oqartunik, niuffaffinni aningaasaqaqqilerpat aammalu Kalaallit Nunaata aatsitassarsiornermut piolitikkia sumut sammiveqarnersoq ilisimalerutsigu, taava taakkua piginneqatigiiffimmut aningaasaleerusupput, Nunamineralsip siulersuisuini siulittaasoq Birks Bouvaird oqarpoq.
Aarlerinartortaqanngilaq
Aningaaserivimmili Grønlandsbankenimi sullissisunut pisortaq Peter Petersen naapertorlugu taamatut iliorneq NunaMineralsimut aarlerianartortaqanngilaq, aningaasaliisartummi tamakkua eqqumaffigerermatigit.
- Taama pineq aningaasaliisartut nutaat Kalaallit Nunaanni aningaasaleerusunnernerannut akornutaanavianngila. Taama iliortoqarsinnaanera aningasaliisartut akornanni ilisimaneqarpoq, Nunaminerals-illu atuussimanerani ernumalersitsisunik takussutissaqangilaq, Peter Petersen oqarpoq.
Oqariartuutit imminnut ataqatigiinngillat
Birks Bovairdili isumaqarpoq, aatsitassarsiornikkut aningaasarsiornissamik Naalakkersuisut oqariartuuteqarlutillu illuanik Nunaminerals namminersortutut piginneqatigiiffiujunnaarsinnissaa imminnut ataqatigiinngeqisut.
- Isumaqarpunga ersarissunik oqariartuuteqarnissaq pingaaruteqartoq. Paatsiveerussaariinnassappummi aatsitassarsioqatigiiffituaq privatinngorsarneqassappat, aningaasaliisartullu 66 procentii suutaarullutik, peqatigisaanillu Naalakkersuisut nutaamik aqutseriaaseqarlutik ingerlatilerlutik, Birks Bouvaird oqarpoq
Naalakkersuinikkut aqutseriaatsip paasiuminaannera ajoqutaavoq
Taassumalu erseqqissaatigaa aningaasaliisut ukiuni marlunni kingullerni aatsitassarsioqatigiiffimmut aningaasaleerusuttarsimannginerinut, nunatsini naalakkersuinikkut aqutserisiaatsip paasiuminaannera patsisaaasoq.
- Ukiut marluk matuma siorna qularutigineqanngilaq Kalaallit Nunaat aningaasaliiffigissaqqissuusoq. Naalakkersuisut patajaatsuusutut, aammalu aatsitassarsiornermi malittarisassat paasiuminarlutillu malinneqartut nunani tamalaani misigineqarput.
- Kisianni piffissami kingullermi ajoraluartumik aalassassimaarnermik misigisaqalaartarpugut, aningaasaliisartullu Kalaallit Nunaani maanna pisunut nalornisimapput, pisullu paasiuminarsisilertinnagit Naalakkersuisunut pimoorussisuungitsunut, aammalu aatsitassanik piiaarmut aatsitassanillu ujarlernermut tapersersuinngitsunut, aningaasaliinavianngillat, NunaMineralsimi siulersuisuni siulittaasoq canadameersoq Birks Bouvaird oqarpoq.
Bouvaird-ip Naalakkersuisut siulittaasuat Kim Kielsen peqatigalugu pitsaasumik aaqqissuteqarnissartik neriuutigaa.
Kim Kielsen oqaaseqartinniaraluarparput ullumili attavigisinnaanagu.