Nunami allanngutsaaliukkami Siriuseqarfik tassaamit eqqugaasoq
Tunup avannaani nunap allanngutsaaliukkap Ella Ø-p eqqaani kangerluit ilaanni Dickson Fjordimi arfininngormat ullaap tungaani tassaartoq nalunaarsorneqarpoq.
Issittumi Sakkutooqarfik umiarsuarmi takornariartaammi Dickson Fjordip eqqaatigoortumi issimasut ilaannit pinerata aqaguani attavigineqarpoq. Attaveqartoq Siriusip alapernaarsuisuinut ilaanikuusimavoq, taamaammat Ella Ø-mi Siriuseqarfik isikkumisut ikkunnaarsimasoq taassuma maluginiarsimavaa.
Issittumi Sakkutoqqarfik Facebookimi taama ilisimatitsivoq.
Taamaammat Issittumi Sakkutooqarfiup timmisartua Challenger umiarsuaalu alapernaarsuut Knud Rasmussen umiarsuarmut takornariartaammut Alpefjordimi sapaatit akunnerata siuliani ikiuutereerluni Dickson Fjordip eqqaatigoortoq misissuiartorlutik tassaaqarfiusimasumukalertorput. Siriusip alapernaarsuisuineersut aamma ornigupput.
Qaqqamit sisoortoqarnerata kingunerisaanik Dickson Fjordimi Ella Ø-milu tassaaqarsimasoq misissuineranni erserpoq.
Tassani Siriuseqarfik tassaamit eqqugaammat tassani atortut ilaat mallinit ammussaasimapput. Siriuseqarfik inuerukkallarnikuummat ajoqusertoqanngilaq.
Umiarsuarmi alapernaarsuummi Knud Rasmussenimi inuttat Siriusip alapernaarsuisuneersullu Siriuseqarfimmi maanna saleereersimalerput.
Taamaammat suliaq taanna inaareeritsik, Issittumi Sakkutooqarfik ilisimatitsivoq.
Tassaarsimasup qanittuaniittut mianersoqquneqartut
Kalaallit Nunaanni Politiit aamma Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfik Tunup avannaani tassaarsimasup qanittuaniittut mianersoqquaat.
Ingammik angallatit umiarsuillu takornariartaatit tamatuma qanittuaniittut mianersoqquaat.
Tassaaqarnerani nunap sajunnera Richterip nunap sajuttarneranik uttuutaa naapertorlugu 3,4-nik sakkortussuseqartoq nunalu tamatumalu eqqaa nunap sajunneranit sunnerneqarsimassangatinneqarmat assingusumik pisoqaqqerataannaasoq, Danmarkimi nunatsinnilu nunap qanoq issusianik misissuisarfimmeersut, tassa De Nationale Geologiske Undersøgelser for Danmark og Grønlandimeersut (GEUS) oqaatigaat.
Taassaarnermut peqqutaasoq, GEUS-ip aatsitassanut naalakkersuisoqarfiullu misissuleruttorpaat. Tassaarnerani mallit nunami allanngutsaaliukkami kangerlunni nunamut 50 meterit tungaannut tiffasitsigisumut anngussimasut misissuineranni erserpoq. Taamaammat oqartussaasut umiarsuit tamatuma qanittuaniittut mianersoqquaat umiarsuarnilu taakkunani issimasut nunamut ikaannginnissaannik kajumissaarpaat.
