Nunalerinermi aningaasarsiorfissanik allanik eqqartuisut
Savaatillit nunalerinermi killiliussat pitsanngorsarneqarnissaannut isumassarsiaat tusaallugit qiimmaallannartuusoq, inuussutissarsiornermut naalakkersuisup oqaatigaa.
- Siunissamut sammisumik isiginiarniarpakka inuussutissarsiornermi aningaasartuutit annikillilerneqarsinnaaneri, ilaatigut attaveqaatitsigut periarfissat eqqarsaatigalugit, tamatumanilu minnerunngitsumik innaallagissamut, imermut aamma assartuinermut akiusuni, Qujaukitsoq tusagassiorfinnut nalunaaruteqarluni taama allappoq.
Aamma nunalerinermik inuussutissarsiuteqarnermi aningaasarsiorfigineqarsinnaasut amerlerisarneqarnissaannut savaatillit takorluugaannik tusagaqarnini inuussutissarsiornermut naalakkersuisup nuannaarutigaa.
Tamannalu takornariat nunap immikkoortuanut tikittartut amerliartuinnartut "Farm Holidaysimik" - tassalu nunaateqarfimmi feeriarnissamik - neqerooruteqarfiginerisigut ilaatigut pisinnaavoq.
- Tamatumunngalu atatillugu qularnaarniarpara ukioq manna ataatsimiinnernik workshopsinillu ingerlatsisoqarnissaa, savaatilikkunni nioqqutissianik ineriartortitsinerup periarfissaasa tapiissutaasinnaasullu inuussutissarsiummut isumasioqatigiinnikkut oqaluuserineqarfigisassaannik, Vittus Qujaukitsoq taama neriorsuivoq.
