Nunakkoorutinut aqqut 2018-imut utaqqisariaqartoq
Nunakkoorutinut aqqusinniornissap aningaasalerneqarnissaa Qeqqata Kommunianit 2016-imi missingersuutigineqarsimavoq. Ukiunilu marlunni 18 millionit koruuneqassangatinneqarluni. Pilersaarutillu aningaasalerneqarnissaa piareersimagaluartoq aningaasat suli atorneqanngillat. Akuersissutimmi assigiinngitsut suli amigaataasut kommuni paasissutissiivoq.
Kommunip nunakkut aqqusinniornissamut pilersaaruteqarneranut tusarniaaneq ataasinngormamut killeqarpoq. Tusarniaanerit akissutaat nalilersorneqareerpata kommunalbestyrelsep pilersaarut ataatsimiinnermi juunip 15-iani akuerissagaat naatsorsuutigineqarpoq.
Ataasiinnarlu amigaataalissaaq. Tassa nunakkoorutinut aqqutip avatangiisinut qanoq sunniuteqarsinnaaneranut nalunaajaat taannalu piareerneqassaaq kingornatigullu kommunalbestyrelsemik akuerineqassalluni.
Kommuni naapertorlugu nalunaajaatip akuerineqarnissamut piareernissaa nunakkullu aqqusinniornissap aallartinneqarnissaa 2018-imi aatsaat pisinnaassangatinneqarpoq.
Nunakkut aqqut kingusinnerusukkut aqqusiniviliarineqarsinnaassasoq, kommunip pilersaarutaani nassuaatigineqarpoq. Nunakkoorutinulli aqqutip pilersaarut akuerineqartussaagaluartoq aqqusiniviliornissaq maanna akuerineqarnavianngitsoq kommuni KNR-imut mailikkut allappoq. Aqqusinivissaq 400-500 millionit koruunillu missaanni akeqassangatinneqarpoq tassungali aningaasassat suli pissarsiarineqanngillat.
Kommunalbestyrelsep Naalakkersuisut aningaasartuutinik avitseqatiginiarsimagaluarpaat tamannali 2015-imi itigartitsissutiginikuuaat.
AAMMA ATUARUK Kommuni nammineerluni ATV-nut aqqusiussasoq
