Nukissiorfinni pisortaq ukiuni marlunni atorfeqareerluni soraalersoq
Cicilie Senderovitz Nukissiorfinni ukiuni marlunni qaammatinilu sisamani pisortatut atorfeqarpoq.
Taanna Nukissiorfinni septembarip ulluisa 30-anni pisortaajunnaassasoq, naalakkersuisut tusagassiuutinut nalunaarummi paasissutissiipput.
Suliunnaarnissaq isumaqatigissummik tunngaveqarpoq patsisaali nassuiarneqanngilaq.
Nunalerinermut, Imminut Pilersornermut, Nukissiutinut Avatangiisinullu Naalakkersuisup Kalistat Lundip Cicilie Senderovita nersualaarpaa:
- Naalakkersuisut aamma Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik sinnerlugit Cicilie Nukissiorfinni kusanartumik suliniuteqarsimaneranut qutsavigaara. Cicilie suleqatigilluartorujussuusimavarput, tamatumani tatigeqatigiinneq malunnarsimalluni aammalu pisortat pilersuinerisa qulakkeernissaasa nukittorsarnissaatalu iluatsilluarnissaa ataatsimoorluni kissaatigineqarsimalluni.
Naalakkersuisuttaaq Cicilie Senderovitzip Nukissiorfinni sulisut akornanni atugarissaarnerulersitsisimallunilu aningaasaleeqqinnissanut pisariaqartunut politikkikkut eqqumaffiginninnerulersitsisimasoq tusagassiuutinut nalunaarummi paasissutissiissutigaat.
Nukissiorfiit maskiinanut atortunullu nutaanut aningaasaliisinnaaqqinniarluni innaallagiamut, imermut kiassarnermullu akit qaffakkai aasaq siusinnerusukkut nalunaarutigaat.
Akinik qaffaaneq suliffeqarfiup ukiunut 20-nut 1,8 milliardit koruuninik amigaateqarneq pissutaavoq, aningaasalli amerlanerpaat ukiut qulit iluanni ullumikkut aallartittumik atorneqartussaapput.
