Ini A/S-ip attartuisui arlaqartut imermut akiliutigisartagaat qaffassaaq

INI A/S-p inissiaataani attartortuuguit imermut atuininnut aningaasartuuteqarnerulissaatit.

Agguaqatigiissillugu qaammammut akiliut, imermut siumut akiliut 12 koruunimik qaffaaffigineqassasoq inissiaatileqatigiiffik taama nalunaaruteqarpoq. 

Inissiaatileqatigiiffiup akinik qaffaanera Nukissiorfiit ukioq manna juulip aallaqqaataaniit qaffaaneranut peqqutaasoq, INI A/S tusagassiuutinut nalunaarummini allappoq.

Illoqarfinni marlunni Nanortalimmi Nuummilu imermut atuinermut siumoortumik akiliutigisartagaq 15 procentimik inissiaqarfiit ilaanni qaffassaaq.  

Ukiup naanerani akiligassittartut pinngitsoortinniarlugit, inissialeqatigiiffiup kingumut akiligassittarneq nalimmassaaffiginiarlugu qaffaarnerminnik pissutaasoq inissialeqatigiiffiup aningasaqarnermut pisortaata Frank Lundbladip oqaatigaa.

- Tassa ukua takusinnaasatsinni imeqarfik imminut napatsittuuvoq tassanilu atuineq atuisut namminneq akilersinnasariaqarpaat taannalu takusinnaavarput ukiut siuliini tapiisarsimasut, taannalu pinngitsoortinniarlugu oqimaaqatigiissarnissaa pisariqarsimasoq taakkunani illoqarfinni takusinnaavarput, taanna oqarpoq.

Atuineruneq akiligassaqarneruneq

Siumoortumik akiliutigisartakkaminnik qaffanneqartussat taakkuusut imermik atuinerpaasut erseqissaatigaa, naliginnaasumillu akiliinikippallaarlutik akiligassamik nassitsittartut. Taamaattumik aamma kaammattuuteqarusuppoq imermik atuineq annikitsumiitissillugu taamaasillutik ukiumoortumik naatsorsuusiornermi utertoorsinnaalissagamik.

Inissiaatileqatigiiffiup imermut akiliutiisartagaata qaffattussaanera pillugu qaffaaneq aamma pivoq.

- Uani nalimmassaaneq pisariaqarsimasoq takusinnaavarput, aningaasartuutit qaffaaffigineqartut imermut naatsorsuusiornermi aconto siumut akiliutaasartut nalimmatinngilaq tassani nalimmassaasariaqarsimavugut aningaasartuutigut matussusissagutsigit. Frank Lundblad taama oqarpoq.
 

Nukissiorfiit aningasanik amigartooruteqarmat peqqutaalluni INI A/S akinik qaffaavoq 

Imermik atuineq kisimi qaffaaffigineqassanngilaq, innaallagiaq kiassarnerlu aamma akisunerulissapput.

Imermut innaallagiamut kiassarnermullu akinik qaffaasoqassasoq Naalakkersuisut aalajangersimasut, Nukissiorfiit juuni naasoq nalunaarpoq.

Nukissiorfiup aningaasanik amigartooruteqarnermik qaffaanerannut peqqutaavoq maskiinatik, pigisatik attaveqaasersuutitillu aserfallatsaalineqassammata.Ukiunut 20-nut 1,8 milliardit amigaataapput, aningaasalli amerlanerpaat ukiut qulit iluanni ullumikkut aallartittumik atorneqartussaapput . Nukissiorfiit nittartakkaminni taama allapput.

Nukissiorfiit ukiut kingulliit tallimat imermut innaallagiamullu tunisisarnertik amigartooruteqarfigisimallugu aamma nalunaarutigaat.

Allatut oqaatigalugu Naalakkersuisut aalajangerpaat atuisut akinik qaffaaffigalugit amigartooruteqarneq akilissagaat.  

Nunarsuarmi uuliamut nioqquteqarnermi ukioq manna apriilimi akinik qaffanneranut annikittumik pissuteqartoq, Nukissiorfiit nittartakkaminni taama allapput.

Nukissiorfiup pisortaanerata Cicilie Senderovitzimut tamatumani nalunaarutaa pillugu oqaloqatiginiarsimagaluarparput, oqaluttuamilli uuminnga saqqummiitinnata pisinnaasimanani. Angumersinikuunngilarli.