132.000 voltitalimmik qupinnguallattoq: Nukissiorfik naapertorlugu isumannaassusaa ajoquteqanngilaq

Nuummi mittarfiup eqqaaniittoq sakkortusaavik kapinartulimmik ungalusimavoq, taqqamungalu iseqqusaannginneq paatsoorneqaqqunagu titartakkanik oqaatsimik isumamilluunniit takutitsisunik nalunaaqutsersugaalluni.

Nukissiorfinni teknikkeqarnermut pisortaq Hans Rowedder, taama nassuiaavoq.

Taamaakkaluartoq nukappiaraq 17-inik ukiulik pingasunngormat sakkortusaavimmut isersimavoq 132.000-inillu voltitalimmik qupinnguallalluni. Pinasuartumik Københavnimut Rigshospitaliliaanneqannginnermini Dronning Ingridip Napparsimavianukaanneqaqqaarpoq.

Qanoq ililluni sakkortusaavimmut isersimanersoq politiinit Hans Rowedderilluunniit suli ilisimaneqanngilaq. Nukissiorfiit innaallagiaqarfimmut akisussaasuusut, ajutoornerup pinaveersaartinneqarsimasinnaagaluarnera pillugu allaanerusumik iliorsimasinnaagaluarnerlutik apeqqummut Hans Rowedder ima akivoq:

- Maleruagassaq sakkortusaavinnut atuuttut malillugit sulivugut. Sakkortusaavimmut iserniartunut 100 procentimik isumannaallisaanissaq ajoraluartumik qulakkeeruminaappoq, taanna oqarpoq.

Sakkortusaavik ingerlallluarsinnaasoq

Ajutoortoqarnerata kingunitsianngua politiit peqatigalugit Nukissiorfiit sakkortusaavik misissorpaat aamma sakkortusaavik ajutoorsimanersoq isumannaassusaalu  misissorneqarpoq.

- Isumannaassusaatalu ajoquteqannginnera paasivarput, teknikkeqarnermut pisortaq oqarpoq.

Ajutoorneq tunngavigalugu Innaallagissiornermut Oqartussanut nalunaarusiortoqar6oq taassuma oqaatigaa. Nukissiorfiit politiit akissuteqarnissaat maanna utaqqivaat. Teknikkeqarnermulli pisortap naatsorsuutiginngilaa sakkortusaaviup ajoquteqarneranik politiit nalunaaruteqassasut.

Piffissami qaninnerpaami sakkortusaaviup qularnaatsumik ingerlasinnaaneranik Nunatsinni Innaallagissiornermut oqartussat naliliisut Hans Rowedder paasissutissiivoq.

Rigshospitalimiit uninngasut pillugit oqaaseqartoqartanngimmat nukappiaraq maanna qanoq innersoq KNR-imiit oqaatigisinnaanngilarput.