Nukissiorfiit Uummannami imeq najoqqagassaq suli misissoraat
Nukissiorfiit taamani nalunaarput, imeq najoqqagassaq ikuallannermit putsumillu mingutsinneqarsimanersoq misissorniaritsik.
Misissugassanik marlunnik qallussisimallutik, Nukissiorfinniit KNR-imut allakkatigut akillutik pingasunngornermi allapput. Aappaa akoorutissaqarsinnaaneranik, aappaalu bakteriaqarsinnaaneranik misissugassaq.
Bakterianittoorsimasinnaaneranik misissukkap piumasaqaatit naammassisimavai, akoorutissanittorsimasinnaaneranilli misissukkamit akissutisinissaq Nukissiorfiit suli utaqqivaat.
AAMMA ATUARUK Ikuallaanermit pujoq peqqissutsimut ajoqutaaqisoq
Eqqaavissuarni qulisaanngitsunit nakkutigineqanngitsumik ikuallaanernit putsup akui kræfteqalissutaasinnaasuullutillu timip pissusaanik allanngortitsisinnaasuusut, immikkut ilisimasalik KNR-imut taamani oqarpoq.
Nukissiorfiit aamma allapput, Uummannami erngup pitsaassusia eqqaavissuup ikuallannerata kingorna malinnaaffigeqqissaarniaritsik:
- Imeqarfiup ikuallannerata nalaani sikuummat, putsumi sananeqaatit minnerit imermut ingerlaannaq akuliussimassanngitsut ilimanarpoq, sikueriartorneranilu akuliukkiartorsinnaallutik. Nukissiorfiit misissugassamik sukumiinerusumik imeqarfik tamakkerluni sikueriarpat qallussiumaarpoq, suliffeqarfik allappoq.
AAMMA ATUARUK Imeqarfik putsumik mingutsinneqarsimanersoq misissorneqalerpoq
Eqqakkat ukiorpassuarni ikuallaannarneqartarmata, Uummannami imeq najoqqagassaq ernumanarnerarlugu, innuttaasut arlallit KNR-imut oqarput.
Erngup misissorneqarnerani kingullermi 2017-imeersumi, piumasaqaatit naammassineqartut, Nukissiorfiit tassunga tunngasumik ilisimatitsipput.