Nukappiaqqat persuttaanermik nalaataqartut peqqarniitsunngortarput
Meeqqat amerlavallaarujussuartut anaanatik ilagalugit qimarnguinnukartarput. Qimarnguiit kisitsisaataat tunngavigalugit nunatsinni qimarnguinni meeqqat 300-ut missaat 2011-mi qimarngusimapput.
Angerlarsimaffinnilu persuttaanerup meeqqat pissusilersornerat sunnertarpaa pingaartumik nukappiaqqat peqqarniitsumik pissuseqalersarmata.
- Ilaqutariinni nakuuserfiusartuni meeqqat namminneq inersimasunngorunik nakuusertunngorsinnaanerminnut aamma nakuuserfigineqalersinnaanerminnut annertuumik navianartorsiortarput, ilaqutariinnermut naalakkersuisoq Mimi Karlsen oqarpoq.
Demokraatit sinnerlugit inatsisartuni ilaasortap Astrid Fleischer Rex-ip paragraf 37 naapertorlugu apeqqutaat aqqutigalugu ajornartorsiut tamanna nassuiaateqarfigineqaqquaa. Astrid Fleischer Rex-ip ilaatigut paaserusuppaa meeeqqat ikiorniarlugut qanoq iliuuseqartoqarnersoq.
Ilaqutariit persuttaanermit eqqugaasut naammaginartumik ikiorneqarnissaata qulakkeernissaa kommuunit akisussaaffigaat. Ajortornarsiulli ima annertutigaa kommuunit kisimiillutik tamanna nukissaqarfigisinnaanagu.
Taamaammat Naalakkersuisut sammiunniarpaat persuttaasarnerup akiorniarnissaa pillugu iliuusissatut pilersaarut taannalu 2013-mi upernaajunerani katersornermi saqqummiunneqassaaq.
- Kommunit qimarnguiillu suleqatigalugit ineriartortitsinissamut pilersaarusiornissaq Naalakkersuisut kissaatigaat. Pilersaarummi siunertarineqassaaq kommunit ullumikkut qimarngueqanngitsut qimarnguinnik pilersitsinissaat aammalu maanna qimarnguiit nukittorsarneqarnissaat, Mimi Karlsen allappoq.
Mary Fonden aamam Lego Fonden aningaasaliisimapput qimarnguinni nammattakkanut meeqqanut agguaanneqartartut pissarsiarinissaannut. Nammattakkaniipput kigutigissaatit, sinngusit pinngussallu.
