Nukappiaqqat sumiginnagaaneq atornerluisuunerlu pillugit erinnamik saqqummersitsisut
Nukappiaqqat 4 aamma 5 klassemi atuartut, Nuummi Atuarfik Samuel Kleinschmidt-mi atuartuusut Meeqqat Pisinnaatitaaffii pillugit suliniaqatigiiffik MIO aamma Maasi Pedersen suleqatigalugit nipilersukkamik videoliamik sakkortusinnaasumik saqqummersippaat. Nipilersornermik videoliaq ”Angajoqqaart Part II” -mik qulequtsigaq angerlarsimaffiup avataani inissitaanermi anniaat pillugu imaqarpoq.
Nukappiaqqat aqqanilinnik 14-inillu ukiullit katillugit qulingiluat namminneq qinersimavaat sunarpiaq taalliornermikkut oqariartuutiginiarnerlugu. Misigissutsitik namminneq oqaasertalerpaat, angerlarsimaffiullu avataani inissitaasimagaanni qanorpiaq misiginarnersoq aamma taallaq aqqutigalugu oqaasertaliipput. naak ilaquttatik peroriartornerminni ilagerusunnerugaluarlugit. Namminnermi angerlarsimaffimminniit peersitaanerminnut imigassaq ikiaroornartorlu ajugaatinneqarsimapput.
AAMMA ATUARUK Meeqqat illersuisuat meeqqanut naalakkersuisoqarfik pillugu: Neriuuteqarfigilluinnarpara
Erinnamik taama ittumik sooq saqqummersitsisoqarnersoq Meeqqat illersuisuata Aviaaja Egede Lyngep ima tunngavilersorpaa
- Erinaq meeqqat namminneerlutik ilinniartitsisutik peqatigalugit pilersitareqqaarpaat, MIO-miit tapersersorparput pissutigalugu meeqqat toqqaannartumik oqariartuuteqartarnerat qaqutigoortuummat, soorlu assersuutigalugu angerlarsimaffiup avataanut inissitaalluni qanoq misiginarpa? Aviaaja Egede Lynge oqarpoq.
Angajoqqaat najuuttut ilagaat Johanne Davidsen, taanna attorsimanerarpoq.
- Attortissutigaara, soorunami qiartaqarpoq pissanngatiginikuugakku aamma. Musikvideo aatsaat takoriarakku oqaatsit atorneqartut pikkunarami torrallassimagamikku. Pereersunullu utersaarnarpoq naak ukiut marluk matuma siornali atuiunnaareernikuugaluarlunga, Johanne Davidsen oqarpoq.
Angajoqqaat aamma pisinnaatitaaffeqarput
Angajoqqaat pisinnaatitaaffeqarnerat eqqaamassallugu aamma pingaaruteqartuusoq, Aviaaja Egede Lyngep oqarpoq.
- Angajoqqaalli aamma ikiorserneqarnissaminnut pisinnaatitaaffeqarnerat, tassa ilaqutariit tamakkiisumik ikiorserneqarnissaminnut pisinnaatitaaffeqarnerat oqariartuutaavoq. Tamanna arlaatigut saqqummersikkuminaassimavoq, immaqa tikkuartuunneq pisarnermik soorlu meeqqanut arlaatigut nuanniitsumik pisoqarpat una pissuserineqartarpoq ukorsuit pisuupput ilaalu ilanngullugit, meeqqat illersuisuat Aviaja Egede Lyngep erseqqissaatigaa.
