Assi: Laila Friis-Salling

OL-Laila: Nuannisarnissaq ilorrisimaarnissarlu anguniagassaraakka

Kalaallip Laila Sallingip sapaatip akunneri marluk qaangiuppata ukiuunerani OL-ertoqarnissaanut peqataanissani pingasunngormat tusarpaa. Laila Sallingip OL-imut peqataanissamut ukiut sisamat sakkortuumik sungiusarfigisimavai.

KNR-ip sisorartartoq, angalatooq Københavnimiittoq sisamanngormat oqaloqatigaa. Laila USA-mi World Cupimi peqataaqqammerluni Københavnimut tikeqqammerpoq.

Laila Sallingip OL-imut billetsissani pingasunngormat tiguaa, 32-nilli ukiullip peqataanissani suli upperisinnaanngilaa.

- Isumaqartorujussuuvoq. Eqqumiitsumik misigissuseqarpunga. Nuannaarpunga, aammali eqqumiilliorpunga, tassami ilumut OL-imut peqataalernera suli upperisinnaalinngilara, Laila KNR-imut oqarpoq, OL-imullu peqataanissaminut minnerunngitsumillu ilaquttani takusassani qilanaarpoq.

Laila Friis-Salling ukiuunerani OL-ertoqarnerani freestylemik sisorarnermi Pyeonchangimi Korea Kujallermi februaarip 9-aniit 25-anut unammissaaq.

AAMMA ATUARUK Laila Friis-Salling OL-imi peqataasussatut toqqagaasoq

Sisorartartorli Asiamut aallannginnermini tuini USA-mi sungiusarlutik annersitani misissorteqqaarniarpaa. Tunili ernumassutiginngilaa.

- Tuera ajunngilaq. Qanoq nukittunerulersissanerlugu misissortilaaginnassavara, ajoqutaanavianngilarli. Aamma pingaartumik OL-imi peqataanermik sapinngisaq tamaat atorneqartussaavoq, ilumoorusserpalulluni oqarpoq.

Laila Friis-Sallingip nunarsuarmi timersullaqqinnerpaat unammilersussaallugit sapaatip akunneri marluk qaangiuppata piareersimaffigilissavai. Qujanartumilli nutaanik ilioriaaseqalersimavoq.

- OL-imili unammininni ilanngutissanerlugit takussavarput. Imaassinnaavormi, illalaarluni oqarpoq.

AAMMA ATUARUK Martin Møller OL-eqarnissaanut annguppoq

Laila Friis-Sallingip OL-imut peqataanissaa Danmarkimi sisorartartut kattuffianni ataasinngorpat pisortatigoortumik nalunaarutigineqassaaq, tamatumalu kingorna sungiusarnersuaqalissalluni.

Sisorartartoq Korea Kujallermukannginnermini Schweitzimut piareersariartussaaq, tamatumanili sumi inissisimanissaq apeqqutaatinnianngilaa:

- Nuannisarnissaq, ilorrisimaarnissarlu anguniagaassapput, soorunam aamma sapinngisannik takutitsinissara. OL-imi pitsaanerpaamik ingerlanissara neriutigaara, Laila Friis-Sallingoqarpoq.

Laila Friis-Salling ukiuunerani OL-ertoqarnerani nunatsinniit peqataasussat aapparaat. Martin Møller ujakkaarnermi isorartussutsini assigiinngitsuni aamma unammeqataassaaq. OL-imut peqataasussat marluk tamarmik Qeqertarsuarmi peroriartorput.

AAMMA ATUARUK Piareeqqavunga

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat