Novo Nordisk Fond corona pillugu nunatsinni suliniutinut 1,3 millioner koruuninik tunniussisoq
Novo Nordisk Fondenip corunavirusi akiorniarlugu nunatsinni suliniutit pingasut 1,3 millioner koruuninik aningaasaliiffigai.
Aningaasaateqarfiup Novo Nordisk Fondenip suliniutinut pilertortunut coronavirusimut attuumassuteqartunut aningaasaliissutit kingulliit agguaappai. Aningaasaateqarfillu naalagaaffeqatigiinni suliniutinut katillugit 43-nut 74,9 millioner koruuninik aningaasaliivoq.
Novo Nordisk Fonden tusagassiutinut nalunaarummi taama allappoq.
AAMMA ATUARUK Novo Nordisk Fonden coronavirusip akiorniarneranut 50 millionit koruuninik immikkoortitsisoq
Peqqissutsimut Pitsaaliuinermullu Aqutsisoqarfik aningaasaliiffigitittunut kingullernut ilaavoq, 743.280 koruuninik aningaasaliiffigitilluni. Aningaasat COVID-19-imik tunillatsissimasunik nunap ilaani nunaqarfinnilu napparsimmavinni uninngasunik nakkutiginninnissamut atortorissaarutinut, peqqinnissaqarfimmilu sulisunik pikkorissaanermut atorneqassapput.
- Nuna tamakkerlugu nappaalaneqarlissagaluarpat peqqinnissaqarfiup tamanna suliarisinnaaniarlugu atortorissaarutinik pisinissaanik suliniutip uuma ilaatigut qulakkiissavaa. Aamma peqqinnissaqarfiup sulisuisa pisariaqartitat aallaavigalugit pikkorissarneqarnissaannik qulakkeerinnissaaq, Novo Nordisk Fonden nittartakkamini allappoq.
Tamannali qaqugu piviusunngussanersoq suli nalunartoq, nunatta nakorsaanera tusagassiortunik ullumi katersortitsinermi oqarpoq.
AAMMA ATUARUK Corona: Savalimmiormiut suliffeqarfiutaata maskiina misissuut Nuummut nassiukkaa
Aamma UNICEF Danmark nunatsinni coronavirusimik tunillaassuinissamik pinaveersaartitsinissaq pillugu nunatsinni meeqqanut qulit 17-illu akornanni ukiulinnut sanaamik videoliornissamut atugassanik 360.000 koruuninik tunineqarpoq.
- Coronavirusimut tunngatillugu oqartussat eqqiluisaarnissamut tunngasut innersuussutaat meeqqanut naleqqussarlugit isiginnaagassiami ilaatigut takutinniarneqarput, aningaasaateqarfik allappoq.
Suliniutit pingajuat anigaasaliiffigineqartoq aamma paasissutissiinissamik tunngassuteqarpoq.
Tassalu tusagassiivik Sermitsiaq.AG COVID-19 pillugu paasissutissiissusiornissamut 241.881 koruuninik aningaasaliiffigineqarpoq. Paasissutissiinermut aviisi tusagassiiviup aviisiini marlunni Sermitsiami taavalu AG-mi ilaassaaq nittartakkullu Sermitsiaq.AG-kkut akeqanngitsumik saqqummersinneqassalluni. Paasissutisiinermut aviisi Nuummi najugaqarfinnut aamma agguaanneqassasoq, Novo Nordisk Fonden allappoq.
Suliniutimilu tassani peqqissutsimut naalakkersuisoqarfimmit suleqataaffigineqassaaq.
