Novo eqqartuussivilersuunneqartoq: Arnaq sanigorsartoq naamigut nukillaartoortoq
Danmarkimi nakorsaasiorfissuup Novo Nordiskip nakorsaataata Ozempicip, sanigorsaatitut atorneqarsinnaasup, naarluutigineqarsinnaanera nakorsaasiorfissuup atuisunut mianersoqqussutiginianngilaa.
Arnaq amerikamiu 44-nik ukiulik taama oqarpoq. Taassuma nakorsaasiorfik maanna eqqartuussivilersuuppaa.
Financial Times taama allaaserisaqarpoq.
Eqqartuussissuserisut Morgan & Morgan arnaq 44-nik ukiulik sinnerlugu Novo Nordiskimik eqqartuussivilersuussipput.
- Inuppassuit meriaataripput. Sapaatit akunnikkaarnagit, kisiannili ullut tamaasa, ulloq naallugu, Paul Pennock, eqqartuussissuserisoq Financial Times naapertorlugu oqarpoq.
Inuit katillugit 400-t eqqartuussissuserisunut saaffiginnissimapput, gastroparesemik, tassa naarlunnermik eqqugaanertik pillugu eqqartuussivitsigut suliassanngortitsillutik.
Eqqartuussissuserisunut saaffiginnittut 400-t Novo Nordiskip unammillertaata Eli Lillyp nakorsaataanut sanigorsaatitut atorneqarsinnaasumut Mounjaromut ilaatigut aamma tunngavoq.
Novo Nordiskip Financial Timesimut oqaaseqarnermini oqaatigaa nakorsaat Ozempic ukiualunni pisiarineqarsinnaareersoq, tunisassiarineqarnermilu nalunaarutigineqarnikuusoq nakorsaatip atorneqarnermini assigiinngitsunik saniatigut sunniuteqartartoq.
