Norgemi ukioq aallartiinnartoq aatsaat taama kiatsigilersoq
Bergenip Trondheimillu akornanni Sunndalsørami 19 gradinik kiattoq ippassaq nalunaarsorneqarpoq.
Åndalsnesimi 18,6 gradinik kiattoq, Norgemi silasiortut taassuma siuliani akunnialunnguit sioqqullugu nalunaarutigaat, Norgemi januaarimi aatsaat kiatsigisimanera nalunaarsorneqarluni. Åndalsnesip ilisimaneqaataasa ilaat tassaavoq qaqqaq Trollveggen, 1700 meteritut portutigisoq.
- Norgep avannaani allaanngilaq aasartoq, silasiortoq Martin Granerød oqarpoq.
- Shortsinik ullaap tungaani atukkersortoqarsinnaavoq, qanorlu sivisutigisumik taama kiatsigissanersoq takuunnarsinnaassavarput, Martin Granerød oqarpoq.
AAMMA ATUARUK Australiami 2019-imi aatsaat taama kiatsigaaq
Norgemi januaarimi kingullermik taama kiatsigimmat Tafjordimi 1989-imi 17,9 gradinik kiappoq. Tafjord Åndalsnesip Sunndalsørallu aamma nalaanniippoq.
Norgemi 2019-ip naajartornerani nerumillunilu masannartuliorpoq, silallu piffissami qaninnerusumi allanngungaatsiarnissaa ilimanaateqanngilaq.
- Ullumikkut taama isikkoqartillugu marsip naanissaata tungaanut ukiuunerata pisarnermit kiannerunissaa ilimanarpoq, silap pissusianik ilisimatusartoq Erik Kolstad, NRK-mut oqarpoq.
Norgeminiunut allanullu sisorarnermik nuannarisalinnut tamanna nutaarsiassatsialaanngilaq, Norgemimi sisorarneq nuannerineqaqaaq.
/ritzau/NTB