Norgemi naalakkersuisut Greenpeacemit eqqartuussivimmut suliassanngortinneqartut
![](/sites/default/files/styles/image_934x467/public/article_images/img_0967.jpg?itok=w6nCK4QK)
Uuliasioqatigiiffiit Norgep Issittumi pigisaata ilaani ukiuni 20-t ingerlanerini siullerpaamik uuliasiorlutik qillerisinnaanerannik Norgemi naalakkersuisut akuersinerat akuerineqarsinnaasariaqanngikkaluarpoq.
Norgemi tunngaviusumik inatsimmut Parisimilu isumaqatigiissummut naapertuutinngilaq, avatangiisinik illersuiniaqatigiiffik Greenpeace taama isumaqarpoq.
Taamaammat Norgemi suliniaqatigiiffik Natur og Ungdom peqatigalugu Norgemi naalakkersuisut eqqartuussivimmut novembarip 13-iani suliassanngortippaat.
- Silap pissusiata allanngoriartorneratigut kingunerluutit Naalagaaffiit Peqatigiit silap pissusia pillugu ataatsimiititaliaata mianersoqqussutigisaat pinngitsoortinniassagutsigit, uuliamik sillimmativut tamakkerlugit atorsinnaanngikkigut erseqqilluinnarpoq.
- Taamaammat uuliap maannamut qalloriikkatta atornera iluaqutiginagu paasereerlutigu uuliasioqqinnissaq isumaqanngilluinnartutut isigaarput, Sune Scheller, Greenpeacemi nunani tamalaani suliniutinut pisortaasoq taama oqarpoq.
Norgemi tunngaviusumik inatsimmi paragraf 112, avatangiisit peqqinnartuunissaannik aalajangersaaffiusoq, 2014-imi allanngortinneqarlunilu sukateriffigineqarpoq. Inuttullu pisinnaatitaaffiit pillugit kapitalimut taamani ilannguneqarpoq.
- Taamaammat akuersissutinik nutaanik tunniussisoqarnera inatsisiliornermut tunngatillugu ajornartorsiutitaqarsoraarput, Scheller oqarpoq.
Uuliasioqatigiiffiit katillugit 13-it, ilaatigut Statoil, Barentsip imartaata kujataata kangisissortaani uuliasiornissamut akuersissummik naalakkersuisunit tunineqarsimapput.
Parisimi isumaqatigiissut, silap pissusia pillugu nunarsuaq tamakkerlugu isumaqatigiissutaasoq, silaannaap agguaqatigiissillugu kiassussiata gradinik marlunnik qaangerneqannginnissaanik anguniakkamik ilaatigut imaqarpoq, aamma gradip aappaa avillugu qaangerneqarnaveersaartussaavoq.
Uuliasiornissamulli akuersissutinik tunniussisoqarneratigut taamatut pisussaaffiliisoqarsimanera angujuminaassaaq, Greenpeace taama isumaqarpoq.
- Uuliasiornermik suliniutini uulia gassilu tunisassiarineqareersoq eqqarsaatigalugu, CO2 suliniutinit taakkunannga pilersinneqartoq pissutigalugu gradip aappaa avillugu angussavarput, Sune Scheller taama oqarpoq.
Norgemi tunngaviusumik inatsimmi avatangiisit pillugit aalajangersakkat nutaat Parisimilu isumaqatigiissut eqqartuussivimmi siullerpaamik tunngavilersuutiginiarneqartussanngorput.
/ritzau/