Niviaq Korneliussenip atuakkiaa Canadami saqqummertoq
Niviaq Korneliussenip atuakkiaa "Homo Sapienne" marlunngormat saqqummersinneqarmat atuagaarniarfik inunnik ulikkaarpoq. Naak Montrealimi issikkaluartoq inuit atuagaarniarfimmut iserniarlutik siuleriiaartut imaaginnavipput.
Kalaallit Nunaanni arnat arnaqatiminoortartut atuakkiami qitiupput. Atuakkiaq Canadami USA-milu allaaserineqarmat nersualaarneqartorujussuuvoq, allaammi USA-mi aviisi ullormut saqqummersartoq, ataqqisaasorlu The New Yorker nersualaarinnilluni.
Niviaq Korneliussenip atuakkiaata franskisut saqqummersinneqartussaanera pillugu Niviaq Korneliussen ulluni makkunani Montrealimiippoq. Taassuma saniatigut Quebec Universitymi oqalugiariartorpoq, soorlu aamma naggueqatigiit ilisimatusarfianni Inuit Sivunitsavummi ilinniartut aamma oqaloqatigiartorai.
AAMMA ATUARUK Niviaq Korneliussen nunarsuarmi atuagassiat pingaarnersaanni
Suiaqatiminoortartut inuiaqatigiinni inissisimanerat "Homo Sapienne"-imi sammineqarput, atuakkiarlu Quebecimi soqutigineqaqisoq oqaatigalugu.
Montrealimullu tikilluaqqusaalluarnini Korneliussenip aamma tupigusuutigaa, nuannaarutigalugulu.
Niviaq Korneliussenip atuakkiaa "Homo Sapienne" Canadami franskisut maanna saqqummiunneqarpoq, Frankrigimilu kingusinnerusukkut aamma saqqummersinneqarumaarluni. Atuakkiaq kalaallisut qallunaatullu aamma saqqummersinneqareerpoq, oqaatsinullu allanut kingusinnerusukkut aamma saqqummiunneqassalluni.
Niviaq Korneliussenip KNR-imut aamma oqaluttuaraa kinaassutsimut tunngasumik nutaamik aamma atuakkiulereerluni.
AAMMA ATUARUK Niviaq Korneliussen Aasianni tupaallattoq