Niviaq Korneliussen: Imminut toquttoqartarnera ullut tamarluinnaasa akiorniartariaqarparput

Niviaq Korneliussen nunatta meerartaannut inuusuttaannullu Københavnimi killitsisimaarluni siorna oktobarimi oqalugiarami naalaarluarneqarpoq.

Taanna Nunat Avannarliit Siunnersuisoqatigiivisa Atuakkiortunut Nersornaasiuttagaannik atuakkiani "Naasuliardarpi" pillugu taamani akissarsitinneqarami oqalugiarpoq, nersornaaserneqarninilu nuannaarutigigaluaqalugu oqariartuutaa ilungersunarpoq.

- Nunatsinni imminut toquttut nunarsuarmi amerlanerpaapput. Kinguaariinni arlalinnik amerlasuunik suli maaniissinnaagaluartunik sivisuumillu inuusinnaagaluartunik annaasaqarnikuuvugut, taanna oqalugiarami oqarpoq.

Imminut toqunnermut tunngasumik saqqummiussilluni oqaligiarnerminiilli ukioq ataasinngulernerani annerusumik iliuuseqartoqarsimannginnerarpaa.

Taamaammat imminut toqunnissamik pinaveersaartitsinermut nunarsuaq tamakkerlugu ulloritinneqartumi ersarissumik oqariartuuteqarpoq.

- Nunatsinni ajornartorsiutaangaarmat ullut tamarluinnaasa akiorniartariaqaraluarparput, Niviaq Korneliussen KNR-imut oqarpoq.

Ilaginnaaneq ittuinnarpoq

Imminut toqqunnerup nunatsinni qanoq ajornartorsiutaatiginera ukiut amerlanngitsut matuma siorna aatsaat maluginialerpaa.

Niviaq Korneliussenilu allannikkut oqaasinnguinermik inuusuttunut ilitsersuiartorluni nunatsinni taamani angalavoq. Angalanerminilu ilinniartitami akornanni imminut toqoriartunik ataasiinnaanngitsumik nalaataqarnermini oqartussanut ikiortissarsiortarsimagaluarpoq, ikiorneqaranili.

AAMMA ATUARUK Overvejede selv selvmord: Rørt over Niviaqs tale

Imminut toqunneq pillugu atuakkiaa "Naasuliardarpi" 2020-mi saqqumereersorlu inuusuttorpassuarnit saaffigineqartarpoq.

- Nunatsinni angalagaangama inuusuttunik oqaloqateqartarpunga - oqaloqatiginikuusamali ilaat ukiukingaarmata inuusuttuunerarsinnaagunanngikkaluarpakka - ilaat imminut toqunnissamik eqqarsaateqarnerarnikuupput ikiortissaalatsisarnerarlutillu, Niviaq Korneliussen oqarpoq nangillunilu:

- Tamarluinnarmik oqartussanit ilaginnagaanerarsimasarput.

Siunissaq neriulluarnartoq

Inuusuttunik oqaloqateqaraangami imminut toqunneq tamatigorluinnaq annerusumik minnerusumilluunnit ajornartorsiutaasartoq, taanna oqarpoq.

Oqaloqatigiinnerillu inuunermik kajungerisaqannginnermut tunngasaraluartut, inuusuttunik oqaloqateqarneq Niviaq Korneliussenimut nukissamik tunisisarpoq. 

- Ajornartorsiummik aaqqeerusussuseqalertarpunga akiuerusussuseqalertarlungaluunniit, taanna oqarpoq.

AAMMA ATUARUK Niviaq appisaluussivoq: Oqalugiaataa attortinnartoq uani atuarsinnaavat

Taassumami oqarnera naapertorlugu inuiaqatigiinni kikkut tamarmik ajornartorsiutip alianaqisup anigornissaanut akisussaaqataapput. Ajornartorsiummillu ilorraap tungaanut mumisitsiniarnissaq ilungersunassangatikkaluarlugu siunissaq taartuinnaanngitsoq, taanna isumaqarpoq.

- Inuusuttavut aamma oqaasinnguillaqqissinikuupput. Inersimasuusugullu inuusuttut pisariaqartitsineranni aamma naalaarluarsinnaanngornikuuvagut. Taamaammat nunatsinni imminut toquttartut ikiliartuleqqunaqaat.