Imminut toqunissamut eqqarsaateqartarsimavoq: Niviap oqalugiaataa attortissutigaa
Atuakkiortummi politikkerinut oqalugiaraluaruni iluaqutaassangatinnagu, taarsiullugu inuusuttunut oqalugiarpoq.
Oqalugitaa inuusuttut imminut toquttarnerannut tunngasoq inuppassuarnit attortissutigineqarpoq, aamma Sulisartut Højskolianni Qaqortumi inuusuttunut pingasunut ukiuunerani atuartunut.
Henning Jonathansen, 30-inik ukiulik, Kuumminngaaneersoq.
Niviaq Korneliussenip atuakkiaa 'Naasuliardarfik' Tasiilap eqqaaninngaanneeravit immaqa ilinnut ilisarnarsimassaaq?
- Ilisarnartorujussuuvoq. Nalunngisarpassuarma kammappassuarmalu taanna aqqutiginikuungamikku. Aamma angaaqqarigaluarma tamanna aqqutiginikuummagu.
- Uanga aamma inuusuttuaraaninnit aqqutiginiartarnikooqaara. Qasseerpassuarnik.
Imminut toqunnissamik eqqarsaateqartarluni saaffissaasuarnarpa?
- Aap, ingammik nalullugu qanoq iliussalluni. Soorlu sumut saaffiginnissalluni immaqaluunniit qanoq ingerlariaqqissanerluni nalornillugu. Inuusuttuaraalluni tamakkua aqqutiginiartarlugit nalorninartorujussuuvoq. Saaffissaasuarneq aamma oqaloqatissaasuarneq.
Ikiorneqarnissamik pisariaqartitsivit?
Imminnut toqunnissamik eqqarsaateqaraanni imaluunniit kisimiittutut misigisimagaani Tusaannga oqarasuaat 801180 imaluunniit sms 1899 attavigineqarsinnaavoq.
Oqaloqatiginninneq akeqanngilaq, kinaassutsimilli taasisoqartariaqarani.
Tusaanna pillugu annerusumik uani atuagaqarsinnaavutit.
Illit qanoq anigorpiuk?
- Ilaquttama nalunngisamalu oqaluuttarmannga eqqarsartalernikuuvunga taanna aqqutissaanngitsoq. Siumut ingerlaqqittariaqarlunga atuaqqinniarlunga.
Inuusuttunut saaffissaasuanut illit qanoq siunnersuuteqarsinnaavit?
- Allorfiit Alliarlu ammaannarput. Akeqanngillat. Immaqaluunniit angajoqqaaminnut sullissisunulluunniit oqaloqateqartalernissaannut siunnersorsinnaavakka.
Illimmi oqaloqateqartarnikuuvit?
- Naamik, oqaloqateqartarnikuunngilanga. Ajuissuleraangamali oqaloqateqarniartarpunga. Soorlu Sisimiuni Højskolerallarama ilinniartitsisumik oqaloqateqallattaartarpunga. Annissuilaartarluni iluaqutaasarpoq. Iluaqutaasaqaaq.
Jensiinannguaq Madsen, 22-nik ukiulik, Kangerlussuarminngaanneerpoq.
- Oqaasii imartoqaat aamma attortinnarput. Attorteqataavunga uanga aamma.
Ilissi oqalugiarfigitippusi, tamanna ilissinnut qanoq ippa?
- Ilisarnartoqalaarpoq. Aamma nalunngisaqartarama saaffissaaleqisunik. Taamaammat pitsaagivara taamatut oqalugiarnera.
Oqarputit nalunngisaqartarlutit saaffissaaleqisunik. Suna pillugu saaffissaaleqisut?
- Imminut toqunnissamut qanissinnaasunik eqqarsaatillit. Soorlu aliasuutillit.
Nukaaraq Lukassen, 25-inik ukiulik.
- Assorujuk attortinnarivara. Nersornaaserneqarnermini inuusuttunut tutsitsinera, utoqqatsinera, qujassuteqarnera. Aamma inuusuttorpassuaqarsimassaaq ikiortissarsiortaraluarlutik ikiortissaqarneq ajortunik. Immaqaluunniit ikiorneqarniarnerminni sivisuumik utaqqisartunik. Tassunga tutsitsinera. Qujassuteqarnera utoqqatsernera inuusuttunut nukissaaleqisutut misigisimasunut nukittorsaataassasoq qularinngilara.
Oqalugiaataani ilisarisaqarpit?
- Nunatsinni imminut toquttartut amerlanermut tusarsaasorujussuullutillu. Taanna ilisarnartorujuuvoq. Uanga qanigilluinnangara imminut toqunnikuuvoq. Aamma qanigisarivallaanngikkaluarlugit attaveqarfigisanni ataasiinnaanngitsumik imminut toquttoqarnikuuvoq.
Taama atuakkiorsimanera iluaqutissaqarsoriviuk?
- Qularinngilara inuusuttunut nukissaaleqisutut misigisunut nukittorsaataallunilu takunnilernarsimassasoq inoorusunnermut. Immaqaluunniit paasineqartutut misigisimassasut qularinngilara.
