Niviaq Korneliussen: Ajugaanissara naatsorsuutiginngikkaluarpara
Danmarkimi isiginnaartitsisarfissuup, Skuespilshusep oqalugiartarfianiit atini taaneqarmat issiavimmiit tingingajappoq.
Niviaq Korneliussen nuannaatsangaarluni assanni illuttut eqillugit qungujuppoq.
Atuakkiortutummi taanna nersorneqarluni scenemut novembarip unnuugaa marlunngornermi qaqeqquneqarpoq.
Atuakkiortut 13-it akornanni Nunat Avannarliit Atuakkiortunut nersornaasiuttagaat Niviaq Korneliussenimut tunniunneqarpoq.
Taamatullu nersorneqartup Niviaq Korneliussenip akissarsiani suli upperiuminaatsippaa. Taanna Kalaallini siullersaalluni Nunat Avannarliit Atuakkiortuinit nersorneqarpoq.
- Eqqarsaateqarpianngikkunarpunga taavalu misigissutsikka amerlangaarmata soorlu timinni iluamik inissaqanngitsut, imatut eqqaamasaqarpallaanngilanga. Kisianni soorunami tupaallattorujussuuvunga takorlooraluarakku alla taaneqassasoq, atuakkiortoq 31-inik ukiulik KNR-imut oqarpoq.
- Atuakkialerinermut nersornaat tunniunneqangajalernerani inuusuttut naapittakkakka ilisarisimasakka eqqarsaatiginiaannaavippakka, taamaalillunga eqqissiiminerulaarpunga.
Inuusuttunut qujaniarluni oqalugiarnera
Taassuma oqaluttualiani Naasuliardarpi nersornaaserneqassutigaa. Taanna imminut toqunnermut tunngasunik imaqarpoq siornalu saqqummerluni.
Tamannarpiarlumi aamma ippassaq oqalugiarnermini sammivaa.
Una ilissinnut ullormik inooqqinnissamut nukissaqalersunut oqalugiaataavoq, aqagumi ullup pitsaanerunissaa aqagulu immaqa isumagineqarsinnaanissarsi neriuutigaarsi.Ilissinnut, nakorsap, politiip, ilinniartitsisup, politikerip, upperiunnaagaannut, Niviaq Korneliussen oqarpoq.
AAMMA ATUARUK Niviaq appisaluussivoq: Oqalugiaataa attortinnartoq uani atuarsinnaavat
Niviaq Korneliussen taama oqarpoq, taanna nunatta siuttuinut oqalugiarnissamik piareersarsimagaluarpoq. Oqalugiarninili aallarnerlugu ingerlaannaq erseqqissarpaa, taamaaliornerup iikkamut oqalunneq assigiinnaraa. Taamaammallu oqalugiarnini meeqqanut inuusuttunullu ilungersuuteqartunut tunngatippaa.
Ikiorneqarnissamik pisariaqartitsivit?
Imminnut toqunnissamik eqqarsaateqaraanni imaluunniit kisimiittutut misigisimagaani Tusaannga oqarasuaat 801180 imaluunniit sms 1899 attavigineqarsinnaavoq.
Oqaloqatiginninneq akeqanngilaq, kinaassutsimilli taasisoqartariaqarani.
Tusaanna pillugu annerusumik uani atuagaqarsinnaavutit.
- Oqalugiarama politikerit qanoq misigisimanersut qanoq eqqarsarneri qanorlu qisuariassamaarneri eqqarsaatiginngivippakka. Arlaleriarluta taanna misilinnikuuarput inuiaqatigiittut amerlasoorpassuulluta, aamma oqariartuuteqarnikuuvugut inuusuttunut ikiorsiisarneq annertunerulertariaqartoq.
- Imatut politikerininngaanniit qisuariartoqarpiarneq ajorami, assersuutigalugu atuakkiara saqqummermat politikerininngaanniit aamma eqqartorneqanngilaq. Taamaalillunga neriuut sumi inissisimanersoq naluara, aamma taanna eqqarsaatiginianngilara, taanna nukersorfiginiaanngilara .
Nunat Avannarliit Atuakkiortunut Danmarkimi nersornaasiipput, nersornaaserneqartorlu nunatsinnut tallimanngorpat angerlassaaq.
AAMMA ATUARUK Korneliussen: Tusaaneqarneq ajortut tusarneqarnissaannut akisussaaffeqarpunga
