Nivattaassuit Nuummi umiarsualivissuarmiit imaanut nakkartut
Nivattaassuarnik imaanut nakkartoqartoq politiit ippassaq sisamanngornermi ullup qeqqata siorna nalunaarfigineqarput.
- Aqqaninngulertoq nalunaarfigineqarpugut, akunnerilli marlungajaat qaangiuttut taama pisoqartoq paasinarsivoq, Kalaallit Nunaanni Politiit pigaartuisa pisortaat Jørgen Madsen oqarpoq.
Nivattaassuit Nuummi umiarsualivissuarmi Royal Arctic Linep silataaniit imaanut nakkartut uuliakuulaarsimasut issimasoqartillugillu imaanut nakkartut, politiit pigaartuisa pisortaat ilisimatitsivoq.
- Nivattaassuarni imaanut nakkartuni issimasoq nammineq niullunilu nunamut qaqivoq, kingornalu napparsimmaviliaanneqarluni, Jørgen Madsen oqarpoq.
Taanna ajoqusersimanersoq, politiinit ilisimaneqanngilaq.
Uuliakoorneq aalarluni nungukkiartortoq
- Nivattaassuit uuliakuulaarsimapput, uuliakoornerli aalarluni nammineq nungukkiartussangatinneqarmat siaruatsaaliniarlugu puttaqusiisoqanngilaq, Jørgen Madsen oqarpoq.
Nivattaassuit imaanut ippassaq sisamanngornermi nakkartut qaqinneqareersimanersut suliluunniit immamiinnersut nalugini, politiit pigaartuisa pisortaat oqarpoq ilisimatitsissutigaluguli politiit Sullivinnik Nakkutilliisoqarfik suliaq taanna pillugu attavigereeraat.
