Nittartakkat Oscariannut innersuussaapput
Nersornaat The Webby Award, USA-mi 1996-imili tunniunneqartalerpoq, tassaallunilu internetimi atuisartut akornanni Oscar-itut taaneqarsinnaasoq.
Visit Greenlandip pisortaata, Anders Stenbakkenip, nersornaasigassanngortinneqarnertik nuannaarutiginerarpaa, nersornaasigassatullu innersuunneqarnertik Nunatsinnut, nunattalu takornarialerinermut suliniutaanut, kaammattuutitut isigalugu.
- Kalaallit Nunaat sinnerlugu tulluusimaaqaagut, ilami nuna, isaasalerlugu taama "mikitigisoq", nittartakkat nunarsuarmi pitsaanerpaat akornanniissinnaammat tulluusimaarutigisariaqarpoq, Anders Stenbakken tusagassiutinut nalunaarummini allappoq.
- Nittartagaq ukiup ataatsip matuma siorna pilersikkatsiguli Atlantikup Avannaani nunanilu Avannarlermi nittartakkat pitsaanerpaat kusanarnerpaallu akornanniinnera qularutiginngilarput, maannakkulli greenland.com-ip taama nersornaasigassanngortinneqarnerani nunarsuarmi pitsaanerpaanut akuulernerput uppernarsaatissaqartilerparput, pisortaq nuannaarpaloqaluni unnersiorpoq.
Nersornaat The Webby Award, New Yorkimi maajip 21-anni tunniunneqassaaq, nersornaasigassalli assigiinngitsut kikkuussanersut maajip aallaqqaataanni tusarliunneqareersimassallutik.
Visit Greenlandip nittartagaa greenland.com, marsimi 2011-mi pilersinneqartoq, qarasaasialerisartut Kathart Interactivikkut suleqatiginerisigut pilersinneqarpoq.