Nittartagaq "Nunataq" nunatsinni takornariartitsisartunut aammaassisuussaaq
Nutaamik nittartagaqalernikkut Nunarput takornariartitsisartunut nunarsuup sinneraniittunut ammaanneqassaaq.
Nutaamik pilersinneqaqqammersoq, Nunataq, tassaasoq Reykjavikimi pisiniarfik Nunatsinnut tunngasunik tuniniaaffiusoq nittartagaliulerpoq, taassumalu nunanut allanut angalanissamik aaqqissuussinerit ajornannginnerulersinniarpai, Nunatsinni periarfissat pitsaanerit angalanissanut aaqqissuussisartunut neqeroorutigisinnaalerumallugit.
- Nunataq takornariaqarnermut nittartakkakkut niuertarfiuvoq, taassumalu Nunatsinni takornariaqarnermik sullissisut tuniniakkaminnik akeqanngitsumik nittartaassisinnaatippai.
Aamma atuaruk Kalaallit Nunaannut pilerisaarummik Reykjavikimi ammaasoqarpoq
-Takornariaqarnermik sullissiviit nunarsuarmi tamaneersut taamaalillutik Nunatsinnut angalanissanik aaqqissuussinnaassapput, taamatullu periarfissat misissuataarneqarsinnaanngussallutik, Greenland Centret-imi ulluinnarni pisortaasoq Magnus Asgeirsson taama oqarpoq.
Islandimi assingusumik peqareerpoq
Nittartakkamik assingusumik Islandimi peqareermat, takornariaqarnermik ingerlatsisut pisiassaatiminnik nittartakkamut ilioraasinnaanerat eqqarsaataavoq, nunani allani takornariaqarnermut aaqqissuisut ajornanngitsumik tamakkiisumik pisiassat takusinnaalerniassammatigik.
- Nittartakkap suliffeqarfiit atassusissavai, Tysklandimi Danmarkimi Islandimiluunniit angallannermik aaqqissuisut Nunatsinnut nittartakkakkut inniminniisinnaalissapput, Asgeirsson oqarpoq.
Greenland Centret-minngaanniit angalatsitsivik aqqutigalugu kalaallit Nunatsinniit Islandimut nunanullu allanut billetsisisinnaanissaanut neqeroorfigineqarnissaat angorusunneqarpoq.
Ilulissaniit Spaniamut Madridimut billetsisisinnaalernissaq oqariartuutaavoq, silarlutillugu aallanngitsoornermi angalasup billetsiata atorunnaartarnera pinngitsoortinniarlugu.
- Anguniagarput taanna pingaarnerpaavoq, siunissamiikkaluarpoq angujumaarparpulli, Magnus Asgeirsson taama oqarpoq.
