ASSIT Kalaallit Nunaannut pilerisaarummik Reykjavikimi ammaasoqarpoq

Taamanili Kalaallit Nunaannut isernissamik ammaassisussanik periarfissanik nutaanik ineriartortitsisarsimalluni,  Laugavegur 96-imilu inissisimalluni.

Greenland Centremi ulluinnarni aqutsisuuvoq Magnus Asgeirsson. Taanna oqaluttuarpoq pilerisaarivik Islandip Kalaallit Nunaatalu akornanni takornarianut ikaartarfiussasoq.

- Takorloorparput periarfissanik assigiinngitsunik nutaanik pilersitsinissaq Kalaallit Nunaanni takornariaqarnermut ukkatarinnittunik.

Kattie Nielsen aamma Fridrik Magnusson sullissivimmik piginnittuupput, Narsamili najugaqarfimminni illoqarfiup akunnittarfianik ingerlatsilersimallutik. Greenland Centrep suliassaa pingaarneq tassa kalaallit islandimiullu tunisassiaannik tuniniaaneq, kiisalu angalatitsivimmik ingerlatsineq.

Aamma atuaruk Reykjavikimi Nunarput pillugu illumik ammaasoqarpoq

Greenland Centrep pisiniarfittaanni tuttut puisillu amiinik ulikkaarpoq. Ilisivik tupilannik saqqummersitsiviuvoq, Inuk Designimiillu akisaasat ilusilersukkallu allat pisiassaallutik.

Magnus Asgeirsson oqaluttuarpoq, takornariat Islandimut tikittartut assorsuaq Kalaallit Nunaannut soqutiginnittartut.

- Inuit Islandimut tikittartut amerlasuut aamma Kalaallit Nunaat tikikkusuttaraat, Asgeirsson oqarpoq.

Oqaluttuarlunilu init 300 kvadratmeterisut angitigisut pillugit takorluugaasoq inunnut Kalaallit Nunaannut soqutiginnittunut naapittarfissatut, tassanilu kulturi niuvernermilu isumassarsiat ineriartortinneqarsinnaasut. Minnerunngitsumillu tassani matu kalaallinut ammammat.

- Taamaattumik alakkarusukkaanni kaffisoriartortoqarsinnaavoq, ataatsimeeqateqarluni, assilialiamilluunniit tuniniaalluni. Tapersersorumallusi maaniippugut, Asgeirsson oqarpoq.

Kalaallit Nunaannut takornariartut aqqusaarsinnaapput

Visit Greenlandip isumassarsiaa tunngavigalugu, Greenland Centre takornarianik angalaqatigiiaanik Kalaallit Nunaannut ingerlaartunik aqqusaarneqartassaaq.

- Angalaqatigiiaat Amerikamiit Kalaallit Nunaannut ingerlaarlutik ullaaralaarsuaq Keflavik aqqusaartarpaat. Taamaattumik aaqqissuussiniarpugut, Greenland Centre siulliullugu ornittalertillugu. Nassatatik maaniitissinnaavaat, illoqarfimmullu pisuttuarlutik, uterunillu tamussilaarsinnarlutik unnukkut Kalaallit Nunaannut ingerlaqqittassapput, Asgeirsson oqarpoq.