Nipisat suaat isumaqatigiinngissutaaneri qaangiuttoq: Suannik tunisisinnaaneq ammaanneqarpoq

Poorskimi nereqatigiinnissinni upernakkut mamarsaataalluartartut ilaat amigaatigisimagukkit nutaarsiassatsialaateqarpugut. Nipisat suaat nunatta ilaanni tunisaqqilerput.

Sisimiut eqqaaniit Nanortallip tungaanut nipisat suaat ammarput. Nunatta avannaani suaat qaqugu tunisaaqqilersinnaanersut suli ullulerneqanngilaq.

AAMMA ATUARUK Nipisat suaasa akissaat pillugit isumaqatigiinniarnerit ingerlalluartut

- Royal Greenland A/S-ip aamma KNAPK-p akornanni nipisat suaasa akii pillugit isumaqatigiinniarnerit naammassipput, aamma illuatungeriit isumaqatigiissut atsioqatigiissutigaat. KNAPK Facebookimi quppernermini taama nalunaaruteqarpoq.

KNAPK-p paasititsinera naapertorlugu, suaat kilomut 22 koruuneqassapput 1 koruunimillu bonuseqassalluni.

AAMMA ATUARUK Aki pillugu isumaqatigiinnginneq: Nipisanniarneq suli aallartinngilaq

Nipisat suaannik tunisisinnaaneq apriilip aallaqqaataani ammartussaagaluarpoq. Suannullu akigitinniagaq, KNAPK-p Royal Greenlandillu akornanni isumaqatigiinniarnerit marsip ulluisa 24-annili unittoorutigimmassuk, suannik tunisisinnaaneq ammarneq ajuleraluarpoq.

Royal Greenlandip kiilumut akigitinneqartoq 22 koruuniusoq attatiinnarniarpaa, tamannali akikippallaartoq KNAPK isumaqarpoq.

Maannalu illuatungeriit isumaqatigiissummik atsioqatigiimmata nipisat suaannik pisiniartoqarsinnaanngoqqippoq.